Падляшша далучаецца да адзначэння Дня роднай мовы ў Брэсце

Падляшша далучаецца да адзначэння Дня роднай мовы ў Брэсце

Падляшша далучаецца да адзначэння Дня роднай мовы ў Берасці. 21-га лютага ў грамадска-культурным цэнтры горада над Бугам пройдзе абласное свята роднай мовы “Жывыя вытокі”. У межах свята адбудзецца абласны тур рэспубліканскага конкурсу маладых выканаўцаў эстраднай песні і паэтычна-музычная вечарына “З любоўю ў сэрцы да роднага слова”.

Сярод іншых сваю дзейнасць прадставіць “Музей Малой Бацькаўшчыны ў Студзіводах” і калектыў “Жэмерва”. Фармат удзелу яшчэ вырашаецца. Кажа Тамаш Суліма:

- Паколькі гэтае свята прымеркавана да Міжнароднага дня роднай мовы, мы там будзем выступаць не толькі як госці з Падляшша, але таксама прадставім уласнае выдавецтва на падляшскай мове. Са сваімі кніжкамі будзем сустракаць людзей. Будзем сустракаць, напэўна, таксама і з песняй на падляшскай мове ў выкананні калектыву “Жэмерва”.

Тамаш Суліма з “Музея Малой Бацькаўшчыны ў Студзіводах” адзначае, што супраца з грамадска-культурным цэнтрам у Берасці працягваецца некалькі гадоў.

Таксама сёлета падляшскія выканаўцы плануюць узяць удзел у цыкле этнаграфічных канцэртаў “Рух Зямлі” ў Берасці.