Віцебскія дзеці змогуць перапісвацца з мядзведзем Умкай - героем спектакля мясцовых лялечнікаў

Источник материала:

Беларускі тэатр «Лялька» распачынае свой юбілейны, 30-ты сезон. Планамі на новы творчы год на прэс-канферэнцыі падзяліўся мастацкі кіраўнік калектыва Віктар Клімчук.

На люты запланавана прэм’ера спектакля «Умка» па аповесці класіка савецкай дзіцячай літаратуры Юрыя Якаўлева. Пастаноўку пра прыгоды белага мядзведзяняці зробіць Віктар Клімчук сумесна з мастачкай Наталляй Бурнас.

«Я падумаў, што нашым дзецям трэба новы герой. І ім можа стаць Умка. Казка перанясе ўсіх на Поўнач. Мы плануем таксама наладзіць сувязь з маленькімі гледачамі. Яны змогуць пісаць лісты да Умкі, у яго будзе свая пошта», — паведаміў Віктар Клімчук.

Мастацкі кіраўнік таксама лічыць, што Віцебску неабходны яшчэ адзін спектакль пра Марка Шагала, на гэты раз — лялечны. Хутчэй за ўсё, у аснову будзе пакладзена аўтабіяграфія майстра авангарднага жывапісу.

Першы раз пасля летняга перапынку тэатр адчыніць дзверы 27 верасня. Дадуць прэм’еру — спектакль па п’есе Міхаіла Барценева «Горад клоўна Піка». Гэта дэбют маладога рэжысёра Міхася Клімчука і мастачкі Дар'і Дубовік, студэнтаў Санкт-Пецярбургскай акадэміі мастацтваў.

«Горад клоўна Піка» — нешта іншае, незвычайнае, такога ў «Ляльцы» яшчэ не было. У тэатр прыйшла моладзь, і яна прыносіць змены", — адзначыў мастацкі кіраўнік.

Яшчэ адна адметная падзея — вечарына «Містэрыя ў Белай панны», якая адбудзецца 31 кастрычніка. У праграме — ценявы тэатр, гатычны квэст, вогненнае шоў і паказ спектакля «Загубленая душа, або Пакаранне грэшніка». У групе тэатра разыграюць запрашальны білет на мерапрыемства для тых, хто дашле фотаздымак самай арыгінальнай маскі.

Увесну, на сваё 30-годдзе, артысты здзівяць гледачоў яркай канцэртна-гумарыстычнай праграмай. Падчас «Славянскага базару» тэатр ужо ў трэці раз прыме ўдзельнікаў праекта «Лялечны квартал».

Нагадаем, сёлета «Лялька» распачала продаж квіткоў праз інтэрнэт.