Чыгуначны вакзал у Мінску "замініравалі" 5-літровай пляшкай віскі

Як патлумачыў карэспандэнту Еўрарадыё адзін з супрацоўнікаў транспартнай міліцыі, выклікаць у такіх выпадках спецыялістаў яны абавязаныя “на ўсялякі выпадак”.

Міліцыянт: “Лепш адзін раз перастрахавацца, чым нешта здарыцца. Таму яны (сапёры. — ЕРБ) выязджаюць па кожным пакунку, па кожным выкліку”.



Карэспандэнт Еўрарадыё прыйшоў на месца падзей фактычна адначасова з групай мінёраў. Пакуль адмыслоўцы высвятлялі, што з сябе ўяўляе падазроная рэч, пакінутая ля сметніцы побач з міжнароднымі касамі, супрацоўнікі праваахоўных органаў устрымліваліся ад каментароў. Але калі вызначылі, што прычынай выкліку стаў пакунак з разбітай пяцілітровай бутэлькай віскі і скрутак нейкіх вяровак, камандзір міліцэйскай групы размініравання “Алмаз” расказаў Еўрарадыё, наколькі часта ў іх здараюцца такія выклікі.



Камандзір “Алмаза”: “У прынцыпе, я б не сказаў, што вельмі ўжо часта апошнім часам здараюцца выпадкі, калі нехта паведамляе аб тым, што недзе падкладзеная міна. Ёсць розныя абвастрэнні ў людзей, можа быць, псіхічна неўраўнаважаных. А мы як працавалі, гэтак і працуем у штатным рэжыме. А наконт таго, што людзі сталі больш праяўляць пільнасць, то гэта важна ў цяперашні момант. Вы самі чулі пра тое, якая зараз сітуацыя ў Расійскай Федэрацыі, увогуле па ўсім свеце — часцейшымі сталі тэракты з прымяненнем самаробных выбуховых прыстасаванняў. Таму людзі і праяўляюць пільнасць. І хай яны лепш яе праяўляюць, а мы будзем выконваць свае абавязкі ў такім выглядзе, як вы бачылі зараз, чым адбудзецца нейкае няшчасце, як здараецца ў Расіі”.



Паводле словаў кіраўніка транспартнай міліцыі чыгуначнага вакзала Генадзя Завадскага, выклікаць сапёраў супрацоўнікам іх аддзела даводзіцца даволі часта. І так сябе паводзіць міліцыянтам рэкамендуюць падчас інструктажоў.

Завадскі: “На штодзённых інструктажах даводзяць інфармацыю аб прыкметах выбуховых прыстасаванняў — як гэта можа выглядаць, на што падобна. І яны падчас нясення службы абавязкова звяртаюць увагу на ўсе падазроныя прадметы. У тым выпадку, калі не могуць вызначыць прыналежнасць, што там канкрэтна знаходзіцца, выклікаюцца сапёрна-піратэхнічныя службы для праверкі”.

Праўда, не здолеў узгадаць, калі апошні раз пільнасць міліцыянтаў была апраўданая.