Страшная аварыя ў Магілёве: кіроўца загінуў, пешаход шпіталізаваны

Источник материала:

Учора раніцай на адным са скрыжаванняў Магілёва сутыкнуліся чатыры аўтамабілі. Дапамога ратавальнікаў спатрэбілася кіроўцу “нісана”, расказалі ў МНС. Яго даставілі ў лякарню, дзе ён праз пяць гадзін памёр, паведамілі ў ДАІ Магілёўскай вобласці. Яшчэ адзін чалавек пацярпеў. Хлопец, што перасякаў дарогу па пешаходным пераходзе, шпіталізаваны.

Па інфармацыі МНС, на скрыжаванні вуліцы Астроўскага і праспекта Шміта сутыкнуліся Opel Omega, Nissan 200SX, Mercedes ML і Renault Laguna. Кіроўцу “нісана” заціснула ў салоне машыны, яго вызвалілі выратавальнікі з дапамогай спецыяльнага інструмента. Учора ў 16:30 ад атрыманых траўмаў ён памёр у лякарні, паведамілі супрацоўнікі ДПС.

У шпіталь быў таксама дастаўлены хлопец, які перасякаў праезную частку па пешаходным пераходзе. Ён трапіў пад колы “нісана”.

Першапачаткова паведамлялася, што пацярпеў пасажыр “нісана”. Аднак у ДАІ Магілёўскай вобласці ўдакладнілі: ні ў адной з чатырох машын, што трапілі ў ДТЗ, пасажыраў не было.

Што здарылася ўчора на магілёўскім скрыжаванні? Паводле папярэдніх звестак Дзяржаўтаінспекцыі, “нісан” ехаў проста па вуліцы Астроўскага, а па праспекце Шміта рухаўся “опель”. На скрыжаванні яны сутыкнуліся.

Пасля гэтага “нісан” адкінула на пешаходны пераход, дзе ішоў малады магілёвец. А затым - на “мерсэдэс”. Пазадарожнік пасля ўдару адкаціўся назад і сутыкнуўся з “рэно”.

Як лічаць інспектары, ці то кіроўца “нісана”, ці то кіроўца “опеля” праехаў на забараняльны сігнал святлафора, што і прывяло да аварыі. Ідзе апытанне сведак. Пакуль іх паказанні супярэчлівыя. Вядзецца следства.