Жадаеце пастрыгчыся ці зрабіць прычоску – рабіце заказ, прыедзе цырульнік з Чэрвеня! Жадаеце пашыць сукенку, спадніцу, блузку ці штаны – рабіце заказ, прыедзе закройшчык, здыме меркі, будзеце ў абноўцы! Парвалі чаравікі, “дарэзалі” боты, зламалі абцас –прыносьце, абутак завязуць у КБА і там адрамантуюць. Патрэбна новая пасцельная бялізна, піжама, халат ці плед? Выбірайце і купляйце, а ёсць асобныя пажаданні – рабіце заказ, у горадзе пашыюць “пад вас”!
Любое з пералічаных пажаданняў жыхароў самой Рудні і навакольных вёсак паспяхова выконвае прыёмшчык заказаў сельскага комплексна-прыёмнага пункту “Рудня” Наталля ВЛАСІК (на здымку справа). Менавіта ў гэтым сэнс работы КПП – збіраць заказы і задавальняць патрэбы вяскоўцаў у бытавых паслугах. Таксама да спагадлівай і добразычлівай прыёмшчыцы на КПП вяскоўцы прыходзяць, каб набыць патрэбнае з вялікага спісу прадстаўленых тут гаспадарчых і бытавых тавараў. Кожнаму ветлівая гаспадыня КПП дапаможа з выбарам, дасць слушную параду. На вёсцы ўсе ведаюць адзін аднаго, таму наведвальнікі КПП яшчэ і абменьваюцца навінамі, абмяркоўваюць надвор”е, гаспадарчыя работы, падзеі мясцовага жыцця. Інакш кажучы, часам пункт прыёму заказаў выконвае і ролю месца прыемных сустрэч для аднавяскоўцаў. Пры гэтым Руднянскі КПП з’яўляецца адным з лепшых у раёне, пастаянна перавыконвае план па выручцы і колькасці паслуг.
У Наталлі разам з прафесійным святам у гэтыя дні яшчэ і асабісты маленькі працоўны “юбілей”: роўна год таму яна прыйшла працаваць на КПП. Жыве з мужам у Рудні, цікавіцца жыццём дзвюх дачушак, якія, выйшаўшы замуж, змянілі вясковае жыццё на гарадское. А хутка ў сям’і будзе яшчэ адно свята: чакаюць з’яўлення на свет унука! Няхай ён будзе здаровенькім, а ў Наталлі ВЛАСІК і ўсіх яе калег-“бытавікоў” прыбаўляецца заказчыкаў, відаў паслуг і слоў падзякі ад удзячных кліентаў!
Главная
Гороскопы
