Главная
Гороскопы
У Беларусі адкрылі першы помнік Тадэвушу Касцюшку
12.05.2018 15:10
—
Разное
|
Івацэвіцкі раён, 12 мая. У Марачоўшчыне каля Косава ў Івацэвіцкім раёне Бресцкай вобласці 12 мая адкрылі першы ў краіне помнік генерал-лейтэнанту Тадэвушу Касцюшку.
  Больш чым 12 тысяч долараў на манумент знакамітаму ураджэнцу Беларусі ўдалося сабраць праз краўдфандынг усяго за два месяцы. Пра гэта ў каментары БелаПАН распавёў ініцыятар з`яўлення помніка, журналіст Глеб Лабадзенка.   "Я вельмі ўдзячны людзям, што яны мне паверылі. Адна справа — ідэя, а другая — калі сотні людзей адгукаюцца кожны дзень, тады я падумаў, што назад дарогі няма. І толькі пасля я даведаўся ўсю працэдуру, як ставіць помнікі. На нашых вачах і нашымі рукамі робіцца гісторыя. За савецкім часам Касцюшку банілі, пра яго ніхто не казаў. А сёння, паглядзіце, якое свята. Касцюшка — гэта асоба, якая яднае людзей і пад чырвона-зялёным, і пад бела-чырвона-белым сцягам. Сёння абсалютна бесканфліктна, пад рознымі сцягамі, сабраліся людзі розных перакананняў, і гэта вельмі класна".
   Аўтар помніка, скульптар Генадзь Лойка адзначыў, што "нарэшце беларусы маюць магчымасць сказаць "мой генерал", і падзяліўся хваляваннямі з нагоды беларускай мовы: "Людзі так любяць Касцюшку, а размаўляюць на мове Суворава, што вельмі непрыемна. Заклікаю шанаваць беларускую мову, трэба на ёй гаварыць".  
Выступаючы на ўрачыстым адкрыцці помніка, пісьменнік Уладзімір Арлоў заявіў, што марыць аб адкрыцці помніка Кастусю Каліноўскаму ў Мінску.
 "Гістарычная памяць і культура, мова нацыі, бароняць межы дзяржавы лепш, чым любое войска. І гэтае разуменне існуе ва ўсіх слаях нашага грамадства: ад моладзі да самых высокіх эшалонаў. Гледзячы на гэты велічны помнік і на вашыя шчаслівыя твары, я сёння мару пра тое, што неўзабаве мы збярэмся на адкрыццё яшчэ аднаго помніка нашаму нацыянальнаму герою Кастусю Каліноўскаму. Я мару, што гэты помнік паўстане ў сталіцы".   Пасля ўрачыстага адкрыцця, на якое з Мінска ды іншых гарадоў прыехала каля 500 чалавек, адбыўся канцэрт, дзе прагучала музыка і песні часоў Тадэвуша Касцюшкі. На адкрыцці помніка сярод іншых прысутнічалі дэпутаты Палаты прадстаўнікоў Анатоль Ткачук, Алена Анісім, старшыня Івацевіцкага райвыканкама Аляксандр Грыцук, першы сакратар пасольства ЗША ў Беларусі па пытаннях інфармацыі, культуры і адукацыі Элізабет Льюіс, намеснік старшыні аб`яднання "Беларусы Швейцарыі" Аляксандр Сапега, палітыкі Павел Севярынец, Рыгор Кастусёў ды іншыя.  21 кастрычніка мінулага года помнік Тадэвушу Касцюшку з`явіўся ў швейцарскім горадзе Золатурн, дзе памёр і быў пахаваны нацыянальны герой. Грошы на манумент сабралі прадстаўнікі беларускай дыяспары ў Швейцарыі. У канцы студзеня 2018 года Івацэвіцкі райвыканкам, заручыўшыся падтрымкай Міністэрства культуры і Брэсцкага аблвыканкама, выдаў дазвол на ўстаноўку помніка на тэрыторыі музея-сядзібы Касцюшкі ў Мерачоўшчыне.  Тадэвуш Касцюшка — знакаміты ўраджэнец беларускай зямлі, кіраўнік нацыянальна-вызваленчага паўстання 1794 года на тэрыторыях сучасных Беларусі, Польшчы і Літвы, ганаровы грамадзянін Францыі, нацыянальны герой ЗША і Польшчы.
Чтобы разместить новость на сайте или в блоге скопируйте код:
На вашем ресурсе это будет выглядеть так
Івацэвіцкі раён, 12 мая. У Марачоўшчыне каля Косава ў Івацэвіцкім раёне Бресцкай вобласці 12 мая адкрылі першы ў краіне помнік генерал-лейтэнанту Тадэвушу Касцюшку.... |
|