Пасведчанне і падарункі для шматдзетнай сям’і

На Свіслаччыне з’явілася добрая традыцыя – ва ўрачыстай абстаноўцы віншаваць сем’і, у якіх нарадзілася трэцяе дзіця.

Ініцыятыва правядзення акцыі «Вялікая сям’я – гэта здорава!» зыходзіла ад раённай арганізацыі ГА «Беларускі саюз жанчын», цэнтра сацыяльнага абслугоўвання насельніцтва і аддзела ЗАГС Свіслацкага райвыканкама.

Уручэнне пасведчання шматдзетнай сям’і і падарункаў бацькам нованароджанай Алісы Барысу і Таццяне Шыманіцам ініцыятары акцыі вырашылі прымеркаваць да святкавання Дня Незалежнасці Рэспублікі Беларусь. У цырымоніі ўшанавання прынялі ўдзел старэйшыя дзеці сямейнай пары Соф’я і Ян. Яны хутка паспелі прывыкнуць да малодшай сястрычкі, палюбіць яе і нават самі прыдумалі імя.

Дарэчы, за шэсць месяцаў бягучага года аддзел ЗАГС Свіслацкага райвыканкама зарэгістраваў 13 нованароджаных, якія ў сваіх сем’ях трэція па ліку дзеці. А гэта на 9 дзяцей болей, чым за аналагічны перыяд мінулага года. Наогул у першым паўгоддзі гэтага года ў раёне зарэгістравана 53 дзіцяці. Пакуль самымі папулярнымі сярод жаночых і мужчынскіх імён з’яўляюцца Мілана і Кірыл.

Алена КЕДЗІК.