Інфармацыйна-прапагандысцкая група сустрэлася з працоўным калектывам будаўніча-мантажнага трэста №41

Источник материала:

Аднак найбольш пытанняў трэстаўскія работнікі задалі па будаўніцтве і добраўпарадкаванні Смаргоні. Таму Аляксандр Бажыдай адначасова расказваў аб будаўнічых справах і адказваў на пытанні. У прыватнасці, ён паведаміў, што ў мікрараёне Заходнім, з паўднёвага боку стадыёна, распачаты падрыхтоўчыя работы да будаўніцтва 64-кватэрнага дома. Цяпер тэхніка за­дзейнічана на рыцці катлавана. Дом будзе ўзведзены па 240 указе для тых, хто стаіць у чарзе на паляпшэнне жыллёвых умоў.

Сёлета пачнецца будаўніцтва 119-кватэрнага шматпавярховага дома па вул. Камсамольскай, які плануецца ўвесці ў эксплуатацыю ў 2020 годзе. Але спачатку будуць знесены 4 прыватныя дамы. Сем’ям прадастаўлена жыллё ў 9-павярховым жылым доме, які пабудавалі нядаўна работнікі “Гроднажылбуда” па гэтай жа вуліцы.

Цяпер праектуецца 50-кватэрны дом з далучаным да яго дзіцячым садам. Садок будзе невялікі, разлічаны на дзве групы па 20 месцаў. Будаўніцтва гэтага аб’екта распачнецца ў мікрараёне Усходнім.

З залы паступіла пытанне наконт далейшага капітальнага рамонту праспекта Індустрыяльнага. Аляк­сандр Рыгоравіч патлумачыў, што гэтай справай  займаецца  кіраўнік адміністрацыі СЭЗ “Гроднаінвест” Сяргей Ткачэнка. У яе ўваходзяць участкі свабоднай эканамічнай зоны, якія знаходзяцца ў мікрараёне Карані. Ужо выкананы папярэдне праектныя прапрацоўкі, вызначаны кошт работ – каля 5 мільёнаў рублёў. Рамонтныя работы на праспекце пачнуцца летам. Як адзначыў Аляксандр Бажыдай, усё будзе зале­жаць ад інвестыцый, якія выдаткуе СЭЗ “Гроднаінвест”. Пры поўным аб’ёме фінансавання аб’ект будзе скончаны сёлета.

Намеснік старшыні райвыканкама Аляк­сандр Бажыдай паведаміў, што атрымана заключэнне па праектнай дакументацыі і, магчыма, неўзабаве ўзбекская кампанія прыступіць да падрыхтоўкі пляцоўкі  для будаўніцтва завода па перапрацоўцы бавоўны. Цяпер узводзіцца вытворчая база. А яшчэ гэта фірма купіла ў мікрараёне Усходнім участак зямлі, выконваюцца праектныя работы па будаўніцтве гасцініцы на 40 месцаў. Там жа будзе і рэстаран усходняй кухні.

Работнікі трэста пацікавіліся наконт басейна, які планавалася рэканструяваць у фізкультурна-аздараўленчым комплексе “Юнацтва”. Аляксандр Рыгоравіч адказаў, што праект на рэканструкцыю гэтага аб’екта распрацуюць у Маладзечне. Прадугледжаны дзве ванны. Адна - на 500, другая – 60 метраў кубічных. Замене падлягае ўсё састарэлае абсталяванне.

Юрый ЯНУШКЕВІЧ.

Фота аўтара.