Главная
Гороскопы
Карэліцкая дзіцячая бібліятэка да акцыі «Бібліяноч-2019», прысвечанай 75-годдзю вызвалення Беларусі ад нямецка-фашысцкіх захопнікаў, падрыхтавала насычаную інтэрактыўную праграму для сваіх юных чытачоў.
Вядучыя сустрэчы Галіна Казак і Марына Вярбіцкая запрасілі пяцікласнікаў з сярэдняй школы №2 г.п. Карэлічы паспрабаваць салдацкага жыцця. Дзеці пачулі песні і вершы ваенных гадоў. Кранулі школьнікаў і ўспаміны ўдзельнікаў Вялікай Айчыннай вайны. Асабліва юных карэліччан уразіла тое, як няпроста было дзецям у гады фашысцкай навалы і што іх аднагодкам прыходзілася шмат працаваць і нават ваяваць. Таксама новыя веды атрымалі пяцікласнікі дзякуючы выставе «У сэрцах і кнігах памяць пра вайну» і фотаальбомам.
У тэматычным кутку «Палявая пошта» хлопчыкі і дзяўчынкі пачыталі лісты салдатаў да сваіх блізкіх і напісалі па некалькі радкоў да ветэранаў Вялікай Айчыннай вайны. А адпачыць і падмацавацца кашай школьнікі змаглі пад елкай на пяньку ў імправізаванай палявой кухні.
Падарожжа ў ваеннае мінулае школьнікам спадабалася, але, прызналіся юныя карэліччане, лепш жыць заўжды так, як сёння, — пад мірным небам.
Марына КАЗЛОВІЧ
Фота аўтара