Беларускі школьнік паказаў нелегалу з Расіі, які ішоў у ЕС, няправільны напрамак

У Бераставіцкім раёне Гродзенскай вобласці затрымалі нелегала з Расіі, які спрабаваў перайсці ў Польшчу. Памежнікам дапамог вучань 9-га класа Максім Каплінскі. Менавіта да яго звярнуўся каля крамы ў цэнтры аграгарадка "Памежны" невядомы мужчына з заплечнікам. Ён спытаўся, у якім баку знаходзіцца мяжа з Польшчай і колькі да яе кіламетраў. Хлопец паказаў няправільны напрамак, а сам патэлефанаваў памежнікам. Да іх прыбыцця школьнік назіраў за нелегалам.

Як інфармуе прэс-служба Дзяржаўнага памежнага камітэта Беларусі, затрыманы аказаўся 25-гадовым грамадзянінам Расіі. Два гады таму ўраджэнец Курганскай вобласці ўжо спрабаваў нелегальна патрапіць праз Беларусь у ЕС, але быў затрыманы і дэпартаваны. На 5 гадоў яму быў забаронены ўезд на тэрыторыю нашай краіны. У дачыненні замежніка распачалі крымінальную справу, яму пагражае да 3 гадоў пазбаўлення волі.