Кіраўчанка Лізавета Пялава на рэспубліканскай канферэнцыі адрымала дыплом ІІ ступені

З мэтай развіцця навукова-даследчай дзейнасці як эфектыўнага фактара павышэння якасці адукацыі і ўсебаковага развіцця асобы вучняў у Рэспубліканскім цэнтры экалогіі і краязнаўства прайшла рэспубліканская навукова-практычная канферэнцыя «Краязнаўчыя даследаванні як сродак далучэння навучэнцаў да пошукава-даследчай дзейнасці» з удзелам прадстаўнікоў Міністэрства адукацыі Рэспублікі Беларусь, Беларускага фонду культуры, Нацыянальнай акадэміі навук Беларусі, Беларускага дзяржаўнага універсітэта культуры і мастацтваў.

Як адзначыла дырэктар СШ №2 імя К.П.Арлоўскага Галіна Русецкая,  удзельнікам канферэнцыі была і вучаніца 10 класа нашай установы адукацыі Лізавета Пялава. Папярэднічалі гэтаму адбор на раённым і абласным этапах конкурсу «Скарбонка краязнаўчых знаходак». На рэспубліканскі этап было прадстаўлена больш за 70 работ, у тым ліку і 5 – прадстаўнікоў Прыдняпроўскага краю, у ліку якіх – работа Лізаветы Пялавай і Ксеніі Котавай «Краязнаўчая знаходка – месцазнаходжанне і тэхналогія шкляной вытворчасці XIX стагоддзя ў в.Гута Качэрыцкай воласці» (кіраўнік Алена Каранкевіч).

Па ацэнцы рэспубліканскага журы 40 лепшых праектаў былі прадстаўлены на канферэнцыі. І зноў фартуна – на баку кіраўчан: яны ў ліку гэтых сарака. Па ўмовах канферэнцыі работу павінен быў абараняць адзін чалавек. Усю адказнасць за вынік агульнай карпатлівай працы ўзяла на сябе Лізавета Пялава і годна вытрымала экзамен. У выніку – дыплом ІІ ступені!

– Я рада, што мне пашчасціла прыняць удзел у такім мерапрыемстве. Даведалася аб шмат чым новым і атрымала вялікі вопыт, які абавязкова спатрэбіцца мне ў будучым, – адзначыла Ліза. – Магчыма, не ўсё атрымалася так, як хацелася. Цяжка было пераадолець хваляванні, але я разумела, што трэба годна абараніць гонар школы, раёна, вобласці. Дапамагло адчуванне прысутнасці і падтрымкі кіраўніка Алены Міхайлаўны. Таксама я ведала, што за мяне трыма­юць кулакі мае родныя, сябры, настаўнікі. Што тычыцца самой работы, то скажу, што нам з Ксеніяй працаваць над ёй было цікава і нялёгка адначасова. Але побач была Алена Міхайлаўна, за кансультацыяй таксама мы звярталіся да краязнаўцы Сяргея Чайкі.

У нашай установе адукацыі наогул вялікая ўвага надаецца даследчай дзейнасці. Апошнім часам мы змянілі свае адносіны да яе: даследчыкам сёння можа быць не абавязкова вучоны, а і любы чалавек, які хоча навучыцца атрымліваць новыя веды сам. Менавіта самаадукацыя і самаразвіццё дапамогуць нашым вучням быць паспяховымі і ў дарослым жыцці.