27 і 28 студзеня ў Мінску прайшоў IV рэспубліканскі форум «Роля рэгіянальных СМІ ў развіцці сацыяльнага партнёрства»

Источник материала:

Грунтоўныя адказы на шматлікія пытанні змаглі атрымаць журналісты на IV форуме “Роля рэгіянальных СМІ ў развіцці сацыяльнага партнёрства”, які прайшоў у Мінску 27 і 28 студзеня.

У рабоце форума прынялі ўдзел старшыня Федэрацыі прафсаюзаў Беларусі Міхаіл Орда і міністр інфармацыі Рэспублікі Беларусь Аляксандр Карлюкевіч.

Было адзначана, што ФПБ упершыню ў гісторыі краіны выступіла распрацоўшчыкам Працоўнага кодэкса. Дзякуючы актыўнай жыццёвай пазіцыі прафсаюзаў у яго былі ўнесены каля 40 паправак.

З увядзеннем у гэтым годзе новай сістэмы налічэння зарплаты ў бюджэтных арганізацыях у наймальніка пашырыліся магчымасці па размеркаванні прэмій і даплат. Пра гэта таксама ішла гаворка ў час пасяджэння.

Лідар прафсаюзаў расказаў аб прававой абароне работнікаў, якую ажыццяўляюць прафсаюзныя юрысты.

Міністр інфармацыі ў сваім выступленні звярнуў увагу на тое, што друкаваным выданням краіны не хапае крытычных матэрыялаў на месцах, таму трэба пашырыць праблемна-тэматычную накіраванасць і ўзмацніць блок аналітычных артыкулаў. Ён акцэнтаваў увагу на неабходнасці жанравай разнастайнасці матэрыялаў у рэгіянальных СМІ.

Прыемным момантам сустрэчы з прадстаўнікамі сродкаў масавай інфармацыі стала ўручэнне падзяк ФПБ і ганаровых грамат Міністэрства інфармацыі лепшым журналістам краіны.

Сяргей РАЙЧОНАК.