«Для інфармавання зацікаўленых». Амелянецкай беларускай школе быць

Источник материала:

Такая выснова вынікае з паведамлення за подпісам старшыні Камянецкага райвыканкама Валянціна Зайчука.

Яшчэ некалькі месяцаў таму ўздымалася пытанне аб закрыцці дадзенай школы, якая з’яўляецца апошняй сярэдняй беларускамоўнай у раёне.

Жыхары вёскі ў адказ на пагрозу закрыцця сабралі подпісы пад зваротам да ўладаў у абарону школы. Улады на чале з Валянцінам Зайчуком вымушаныя былі сустрэцца з амелянчукамі, але пэўных адказаў тады не агучылі:

– Ні пра якое закрыццё размовы яшчэ не вядзецца, пакуль вывучаецца пытанне, таму што не так проста сёння закрыць школу. Для таго, каб прыняць узважанае пытанне, як нам быць далей, ёсць некалькі варыянтаў: і пакінуць школу, і зрабіць яе базавай.

https://www.racyja.com/wp-content/uploads/2020/04/2020-04-01_liaskievic_zajcuk_amielianieckaja_skola_g.mp3

Неўзабаве Амелянец наведаў памочнік прэзідэнта па Берасцейскай вобласці Анатоль Маркевіч, і вось 31 сакавіка мясцовыя ўлады накіравалі «для інфармавання зацікаўленых» дадатковае паведамленне на той зварот:

– Камянецкі раённы выканаўчы камітэт на ваш электронны зварот дадаткова паведамляе наступнае: Камянецкім райвыканкамам праведзены аналіз мэтазгоднасці функцыянавання дзяржаўнай установы адукацыі «Амелянецкая сярэдняя школа» Камянецкага раёна. Па выніках праведзенага аналізу, неабходнасці ў закрыцці або рэарганізацыі дадзенай установы адукацыі цяпер няма. Установа адукацыі працягне працу ў штатным рэжыме.

https://www.racyja.com/wp-content/uploads/2020/04/2020-04-01_liaskievic_nacytka_amielianieckaja_skola_g.mp3

Адным з ініцыятараў кампаніі ў абарону апошняй беларускамоўнай школы ў Амелянцы стаў настаўнік геаграфіі і фізкультуры згаданай установы Павел Кендысь, які таксама атрымаў дадзены адказ уладаў.