Юрый ГЛУШАКОЎ: “З Раманчуком мы разыходзімся ў поглядах...”

Источник материала:

Беларуская партыя “Зялёныя” аб’явіла імя свайго прэтэндэнта на пасаду прэзідэнта Беларусі. Прывіваць беларусам новыя дэмакратычныя і экалагічныя ідэалы будзе жыхар Гомеля Юрый Глушакоў.

Пасля чарнобыльскай катастрофы экалагічная тэма стала адной з центральных у Беларусі. Да яе з перыядычнасцю аднолькава звяртаюцца прадстаўнікі афіцыйнай і неафіцыйнай улады. “Зялёныя” першымі ў краіне зрабілі экалагічнае пытанне падмуркам сваёй праграмы.

Навошта нам прэзідэнт?

У пэўным сэнсе Юрый Глушакоў марыць выканаць ролю палітычнага камікадзэ. І размова тут ідзе не аб банальнай адмове ад сваіх галасоў на карысць іншага кандыдата.

“Мы будзем развіваць кампанію да поўнага скасавання прэзідэнцкай пасады, -- смела заявіў спадар Глушакоў.

Кандыдат ад “Зялёных” бачыць у любой уладзе небяспеку аўтарытарызму, таму нават аб сваім верагодным прэзідэнцтве кажа як аб часовым стане.

А як жа экалогія?..

У расповедзе аб сваёй праграме Юрый Глушакоў старанна пазбягаў экалагічных пытанняў. Нібыта ўсё і так зразумела. А калі не?

“Безумоўна, наш галоўны экалагічны прыярытэт -- супраціўленне будаўніцтву АЭС у Беларусі, -- адказаў на пытанне Юрый Глушакоў.-- Большасць экалагічных пытанняў, якія мы закранаем, -- спецыфічныя. Напрыклад, мы павінны разабрацца з дырэктывай прэзідэнта аб выкарыстанні мясцовых відаў паліва…”

Наватарскім планам партыі “Зялёныя” стане распрацоўка законапраекта аб паўсюдным увядзенні велапарковак…

Дарэчы, артыкул у перадвыбарнай праграме спадара Глушакова, прысвечаны экалогіі, самы маленькі. Ён налічвае толькі 5 пунктаў.

Гусь свінні не таварыш?

Беларуская партыя “Зялёныя” не адмаўляе таго, што пакуль іх палітычны ўплыў у краіне мінімальны. Таму кіраўніцтва гэтага аб’яднання разлічвае на падтрымку аднадумцаў.

“Мы адкрыты для супрацоўніцтва з усімі канструктыўнымі палітычнымі сіламі, -- прызнаўся Глушакоў. -- Канечне, прыярытэт будзе надавацца тым, хто падзяляе нашы прынцыпы сацыяльнасці, экалагізму і дэмакратыі”.

Пакуль у шэраг тых, хто “падзяляе прынцыпы”, патрапіў толькі Аляксандр Мілінкевіч… А вось з АДС сяброўства можа і не атрымацца… Калі Аб’яднаныя дэмакратычныя сілы вылучаць у кандыдаты на пасаду прэзідэнта Яраслава Раманчука, “Зялёныя” ім не таварышы.

“З Раманчуком мы разыходзімся ў поглядах на цэлы шэраг пытанняў, -- заявіў Глушакоў. -- Сыходзячы з гэтага мы і будзем будаваць нашы ўзаемаадносіны”.

Адкуль грошы?

Варта адзначыць, што Беларуская партыя “Зялёныя” адноўлена па ініцыятыве сур’ёзных і мэтанакіраваных людзей. Яшчэ падчас вылучэння на выбары ў мясовыя Саветы дэпутатаў сённяшні кіраўнік выбарчай кампаніі Юрыя Глушакова Дзмітрый Кучук прызнаўся, што ў фінансавым плане “Зялёныя” спадзяюцца толькі на сябе. Спадар Кучук адначасова з’яўляецца і дырэктарам ПУП “Смеццесартыровачная станцыя ЗАХОДНЯЯ”, грошы ад гэтага бізнесу ідуць на фінансаванне партыі.

“Наш галоўны рэсурс -- гэта нашы людзі, -- выказаўся прэтэндэнт на пасаду прэзідэнта Беларусі Юрый Глушакоў. -- Усё астатняе другасна, у тым ліку фінансавая дапамога. Мы спадзяёмся на падтрымку нашых грамадзян…”

ЗАКУЛІССЕ

Банкету не было

На знаёмства з кандыдатам на пасаду прэзідэнта ад Беларускай партыі “Зялёныя” былі запрошаны не толькі журналісты, але і ўсе жадаючыя. Меркавалася, што прадстаўленне народу Юрыя Глушакова пройдзе ва ўрачыстай атмасферы. Нагадаем, што мерапрыемства адбывалася ў адным з самых шыкоўных гатэляў Мінска “Crowne Plaza”. Паглядзець на верагоднага прэзідэнта прыйшло каля трыццаці чалавек. Некаторыя з іх нават спадзяваліся на падарункі ці хаця б фуршэт.

На жаль, “Зялёныя” не расшчодрыліся нават на каву. Верагодна, напярэдадні выбараў партыйцы вырашылі сэканоміць. Таму прадстаўленне прэтэндэнта на пасаду прэзідэнта Беларусі прайшло ў фармаце звычайнай прэсс-канферэнцыі.

Теги: Гомель