Рада інтэлігенцыі не адмаўляецца ад ініцыятывы па вызначэнні адзінага кандыдата

Источник материала:

Рада беларускай інтэлігенцыі (РБІ) не адмаўляецца ад ініцыятывы па вызначэнні адзінага кандыдата ў прэзідэнты ад дэмакратычных сіл. Такое рашэнне было прынята на пасяджэнні рады 3 жніўня, паведаміў БелаПАН старшыня РБІ Уладзімір Колас.

Як паведамлялася раней, РБІ разглядала пытанне адмовы ад ініцыятывы па вызначэнні адзінага кандыдата ў прэзідэнты.

«На аўторкавым пасяджэнні было вырашана не спыняць гэтую дзейнасць. Мы канкрэтызавалі патрабаванні да прэтэндэнтаў на адзінага кандыдата ў прэзідэнты ад дэмакратычных сіл, улічваючы іх маральныя, арганізацыйныя, функцыянальныя, рэсурсныя якасці», — заявіў Колас.

Паводле яго слоў, у гэтым фармаце колькасць прэтэндэнтаў у адзіныя кандыдаты «значна скарачаецца».

«Таксама мы выставілі шэраг умоў да гэтых прэтэндэнтаў. Галоўная з якіх — вызначыць дакладную дату вылучэння адзінага кандыдата ад дэмсіл на пасаду прэзідэнта Беларусі», — адзначыў Колас.

Рада беларускай інтэлігенцыі з красавіка праводзіць кансультацыі з лідэрамі дэмакратычнай апазіцыі па вылучэнні адзінага кандыдата на выбары кіраўніка дзяржавы.

Нагадаем, паводле вынікаў кансультацый РБІ з лідэрамі палітычных партый, рухаў і грамадскімі дзеячамі, што адбыліся ў красавіку-чэрвені, Яраслаў Раманчук, Мікалай Статкевіч, Аляксандр Казулін, Аляксандр Ярашук, Сяргей Калякін, Уладзімір Някляеў, Віталь Рымашэўскі і Рыгор Кастусёў пагадзіліся ўдзельнічаць у вылучэнні адзінага кандыдата і выкарыстоўваць пляцоўку рады для дасягнення дамоўленасці аб сумесных дзеяннях. Пакуль не вызначыўся са сваім удзелам у гэтым працэсе Андрэй Саннікаў.

Аляксандр Мілінкевіч і Алесь Міхалевіч адмовіліся ўдзельнічаць у ім.