У Беларусі гатовы падтрымаць дзейнасць Ашчадбанка Расіі

Источник материала:

Аб гэтым заявіў Прэзідэнт Беларусі Аляксандр Лукашэнка ўчора на сустрэчы са старшынёй праўлення Ашчадбанка Расіі Германам Грэфам, перадае карэспандэнт БЕЛТА.

"Ашчадбанк Расіі прыйшоў у Беларусь надоўга, з нашага пункту гледжання, і мы павінны ўсяляк яго падтрымаць, — сказаў кіраўнік дзяржавы. — Банк выказаў жаданне фінансаваць вельмі многія праекты ў нашай краіне — выбірайце любыя, мы вам абсалютна давяраем і будзем вас падтрымліваць".

Аляксандр Лукашэнка адзначыў, што першапачаткова ў Беларусі была пэўная насцярожанасць адносна Ашчадбанка Расіі, аднак яна была матываваная. "У нас была вялікая насцярожанасць, што ў Беларусь ідзе магутны, вялікі банк, — сказаў Прэзідэнт. — Але прайшоў час, і мы бачым, што выканана ўсё, што абяцалі".

Звяртаючыся да Германа Грэфа, кіраўнік дзяржавы падкрэсліў, што магчымасці беларускага боку яму вядомы, і "любыя складанасці, якія могуць узнікнуць, мы пераадолеем разам". Прэзідэнт таксама дадаў, што гатовы абмеркаваць шэраг праектаў і пытанняў, якія датычацца работы банка.

У сваю чаргу старшыня праўлення Ашчадбанка Расіі адзначыў, што за час дзейнасці банка ў Беларусі перавыкананы даволі аптымістычныя планы. "Фактычна ніводны напрамак, які абмяркоўваўся, не застаўся без развіцця", — сказаў ён. Герман Грэф таксама дадаў, што банк набліжаецца да $1 млрд інвестыцый у беларускую эканоміку і даволі паспяхова вывеў Беларусь на знешнія рынкі. Акрамя таго, у поўным аб'ёме выконваецца сумесная праграма па фінансаванні экспарту беларускіх тавараў у Расійскую Федэрацыю. Паводле слоў Германа Грэфа, Ашчадбанк Расіі пачынае новы этап супрацоўніцтва, а менавіта мае намер поўнасцю перарабіць тэхналагічную платформу даччынага банка — ААТ "БПБ-Банк".

Ашчадбанк Расіі з'яўляецца вядучым банкам Цэнтральнай і Усходняй Еўропы. Па выніках 2010 года ён уваходзіць у дзясятку самых прыбытковых банкаў свету, па капіталізацыі займае 14-е месца і ставіць за мэту да 2014 года ўвайсці ў дзясятку самых буйных банкаў. Па выніках 2010 года Ашчадбанк Расіі — лідар на фінансавым рынку Расійскай Федэрацыі па актывах, капіталу і прыбытку. У банкаўскай сістэме Расіі актывы і капітал Ашчадбанка складаюць больш за 25 працэнтаў. Мае даччыныя банкі ў Беларусі, Казахстане і Украіне. Па ключавых паказчыках даччыны банк у Беларусі ААТ "БПБ-Банк" займае трэцюю пазіцыю сярод банкаў краіны.