Саакашвілі заклікаў міжнародную супольнасць весці дыялог з Беларуссю

Грузінскі прэзідэнт Міхаіл Саакашвілі заклікаў міжнародную супольнасць і арганізацыі весці актыўны дыялог з Беларуссю, каб яна не апынулася ў ізаляцыі і яе развіццё ажыццяўлялася ў адпаведнасці з міжнароднымі стандартамі.

Выступаючы на Міжнароднай канферэнцыі "Еўрапейскі шлях Грузіі" 22 ліпеня ў Батумі, Саакашвілі заявіў, што яго краіна дзеліцца вопытам рэформаў з Беларуссю, Малдовай і Ўкраінай.

Ён звярнуў увагу тых, хто лічыць Расію больш дэмакратычнай краінай, чым Беларусь, што апошняя "не ажыццяўляе акупацыю суседніх краін". У выпадку ізаляцыі яна "апынецца ў руках расійскай адміністрацыі", – заявіў Саакашвілі.

"Гэта еўрапейскі выбар. Неабходны дыялог і дачыненні, новыя ініцыятывы. Такія нашы погляды", – сказаў грузінскі лідар.