Беларусь і Кітай маюць намер развіваць узаемадзеянне ў ваеннай сферы

Источник материала:

Беларусь выступае за далейшае паглыбленне ваеннага супрацоўніцтва з Кітаем. Аб гэтым заявіў Прэзідэнт Беларусі Аляксандр Лукашэнка 11 ліпеня на сустрэчы з намеснікам старшыні Цэнтральнага ваеннага савета Кітайскай Народнай Рэспублікі, членам Палітбюро Цэнтральнага камітэта Кампартыі Кітая генерал-палкоўнікам Сюй Цайхоу, паведамілі БЕЛТА ў прэс-службе беларускага лідара.

Кіраўнік дзяржавы ў пачатку сустрэчы з кітайскім госцем перадаў самыя добрыя пажаданні Старшыні КНР Ху Цзіньтаа. "Перадайце яму, што мы помнім тую вялікую падтрымку і дапамогу, якую ён асабіста аказваў і аказвае нашаму народу", — падкрэсліў Аляксандр Лукашэнка.

Прэзідэнт пазітыўна ацаніў узровень беларуска-кітайскага ваеннага ўзаемадзеяння. "Мне вельмі прыемна сёння прымаць дэлегацыю Кітайскай Народнай Рэспублікі, вас, члена Палітбюро ЦК КПК. У мяне ёсць магчымасць ад усёй душы падзякаваць вам за вялікую дапамогу і падтрымку, якую вы аказваеце не толькі нашай арміі, але і краіне", — адзначыў Прэзідэнт Беларусі, звяртаючыся да кітайскага госця.

Кіраўнік дзяржавы падкрэсліў, што склаліся вельмі добрыя адносіны паміж кіраўніцтвам беларускага Міністэрства абароны і кітайскага ваеннага ведамства: "Я хацеў бы, каб гэтыя адносіны развіваліся і паглыбляліся".

Аляксандр Лукашэнка адзначыў вялікі асабісты ўклад Сюй Цайхоу ў паглыбленне адносін паміж ваеннымі ведамствамі Беларусі і КНР. "Гэта не толькі словы падтрымкі, але і канкрэтная дапамога, якая была прадэманстравана на ваенным парадзе на Дзень Незалежнасці", — сказаў кіраўнік дзяржавы, маючы на ўвазе кітайскія ваенныя аўтамабілі, перададзеныя Узброеным Сілам Беларусі.

Прэзідэнт падкрэсліў, што за вялікі асабісты ўклад у развіццё беларуска-кітайскага ваеннага супрацоўніцтва было прынята рашэнне аб узнагароджанні Сюй Цайхоу ордэнам Дружбы народаў.

Кіраўнік дзяржавы падкрэсліў, што нячаста высокай дзяржаўнай узнагароды Беларусі бываюць удастоены прадстаўнікі іншых дзяржаў. "Вы знаходзіцеся ў гэтым невялікім шэрагу ўзнагароджаных", — адзначыў Аляксандр Лукашэнка, уручаючы ордэн Дружбы народаў Сюй Цайхоу.

Кітайскі госць падкрэсліў, што ўручаная ўзнагарода — гэта ацэнка не толькі асабіста яго дзейнасці, але і абароннага ведамства Кітая ў супрацоўніцтве з Беларуссю. "Гэта сведчанне вашага вялікага даверу і разумення", — сказаў кітайскі госць.

Намеснік старшыні Цэнтральнага ваеннага савета КНР перадаў ад імя Ху Цзіньтаа самыя добрыя пажаданні і цёплае прывітанне беларускаму народу і беларускаму лідару. Сюй Цайхоу падкрэсліў, што Кітай і далей будзе ўмацоўваць дружбу і супрацоўніцтва з Беларуссю.