Урок, з якога за вушы не выцягнеш

Источник материала:

Як вы думаеце, як школьнiкi сустрэлi дзень ведаў? Першыя ўрокi — гэта не абавязкова сядзенне за партамi ў межах роднай школы. Хадзiць на заняткi, як высвятляецца, можна ў Нацыянальную школу прыгажосцi, дыягнастычны цэнтр клiнiчнай бальнiцы i нават у метро, альбо завiтаць на ўрок-пленэр у Нацыянальную бiблiятэку Беларусi, дзе можна атрымаць парады, ад вядомага мастака.

— Дзецi, як прыйдзеце дамоў, раскажыце, якую цёцю вы бачылi, — заўважае экскурсавод, што суправаджае адну з дзiцячых груп.

— Вы бачылi цёцю, якая падпiсвала часопiсы, — жартуе васьмiкратная чэмпiёнка свету Наталля Цылiнская.

Адкрыты ўрок па фiзкультуры для знакамiтай спартсменкi ператварыўся ва "ўрок чыстапiсання". Раздаўшы ўжо не адзiн дзясятак аўтографаў, Наталля жартуе: "Будзеце мае аўтографы прадаваць, не забудзьцеся: мне 30 працэнтаў".

— Зараз у вас трэнерская кар'ера? — пытаюцца ў спартсменкi.

— Пакуль "мамская"...

На спартсменку сыплюцца пытаннi пра школу, пра кар'еру. "Дзяўчаткi, станеце чэмпiёнкамi, дасце ж Цылiнскай аўтограф па блаце?" — жартуе Наталля.

А мо i стануць! Хлопчыкам, i дзяўчатам, якiя сюды завiталi на адкрыты ўрок, па 10—13 гадоў, добрая большасць з iх — звычайныя школьнiкi, i толькi адзiн клас спартыўны, але пасля "фiзры" ў "Мiнск-арэне", напэўна, колькасць юных спартсменаў павялiчыцца. Многiя ўжо абяцаюць завiтаць сюды, ды i сяброў прывесцi. Яшчэ б, з новенькай трэнажорнай залы малых не выцягнуць, яны налятаюць на трэнажоры, акупуюць веладарожку, сапуць, скардзяцца, што ўжо i ногi баляць, але пасля перабiраюцца на iншыя трэнажоры i працягваюць старанна i весела займацца, так, што нават адна з мацi, што завiтала на адкрыты ўрок да дачкi, спакусiлася на велатрэнажор i круцiла педалi з не меншым iмпэтам, чым дзецi. Пасля юным гасцям паказваюць шыкоўныя спартыўную i харэаграфiчную залы, дзе прафесiяналы дэманструюць, чаму можна навучыцца, калi займацца пэўны час хiп-хопам, брэйк-дансам цi мастацкай гiмнастыкай. "Мы тут нават плануем распачаць танцавальныя курсы для маладажонаў i выпускнiкоў школ, каб яны годна выглядалi падчас урачыстасцяў, — заўважае спецыялiст аддзела маркетынга Шматфункцыйнага спартыўна-культурнага комплексу "Мiнск-арэна" Алена Харужэнка. — I тут могуць займацца не толькi спартсмены, а ўсе ахвотныя. Прычым як у трэнажорнай, спартыўнай i харэаграфiчнай залах, так i там, дзе знаходзiцца ядро веладрома. Выключна для спартсменаў прызначаны толькi велатрэк з насцiлам з сiбiрскай сасны". Займацца тут можна малым i дарослым. Асобна i сем'ямi. Самастойна i з вядучымi трэнерамi. Да слова, гадзiна ў новенькай трэнажорнай зале каштуе 5 тысяч.

Як трымаць ракетку, калi ты гуляеш у бадмiнтон? Як стаць ролерам i колькi каштуюць ролiкавыя канькi? З чаго зроблена рама i якiмi павiнны быць колы i сядло шасэйнага веласiпеда? Якiя складаныя практыкаваннi можна засвоiць, калi займацца брэйкам паўгода? Усё гэта i многае iншае можна было даведацца падчас урока ў "Мiнск-арэне". Тут жа дзецi прымяралi спартыўную экiпiроўку, фатаграфавалiся са спартсменамi. А яшчэ можна было адразу падабраць для сябе вiд спорту: трэнеры розных спартыўных школ запрашалi хлопчыкаў i дзяўчат да сябе.

"Захочаце экстрыму, каб кроў грала ў жылах — прыходзьце да нас скакаць па трамплiнах. Нам патрэбны каардынаваныя дзяўчаткi, смелыя, рухавыя, — заваблiваў дзяцей у веласпорт заслужаны трэнер рэспублiкi па бай-мiксе Уладзiмiр Церлюкевiч.— У любым вiдзе спорту, калi вы будзеце займацца iм не месяц i не год, магчыма стаць чэмпiёнамi. А яшчэ вы будзеце моцнымi, здаровымi, прыгожымi". Уладзiмiр Антонавiч заўважае, што не так важна, якi вiд спорту абяруць дзецi, але галоўнае, каб яны iм займалiся — гэта аздараўленне нацыi, залаты фонд краiны. А каб дзецi не сыходзiлi, неабходна, каб спорт стаў справай сямейнай, калi мама i тата будуць займацца разам са сваiмi дзецьмi, для малых гэта будзе вельмi iстотна i яны не стануць кiдаць секцыi.

А мо ёсць сэнс правесцi падобныя спартыўныя ўрокi i для бацькоў?