Бітва за зямельныя надзелы ў Мінскім раёне

Источник материала:

Фіктыўная рэгістрацыя грамадзян у Мінскім раёне хутка стане бессэнсоўнай, паведаміў намеснік пракурора Мінскай вобласці Віктар Жынгель.

У апошні час жыхары Мінска і іншых беларускіх гарадоў масава рэгіструюцца ў Мінскім раёне, што дазваляе ім стаць на чаргу маючых патрэбу ў паляпшэнні жыллёвых умоў і ў выніку атрымаць зямельныя надзелы. Асабліва востра гэта праблема стаіць у Бараўлянскім сельскім савеце, дзе людзі рэгіструюцца сотнямі.

Паводле намесніка пракурора, у 2009 годзе ў Мінскім раёне было выдзелена больш за 4,2 тыс. зямельных надзелаў, але нейкія працы рабіліся толькі ў кожным шостым выпадку. Гэта, на думку Жынгеля, сведчыць пра тое, што большую частку зямлі грамадзяне атрымліваюць дзеля далейшага ўзбагачэння.

Аднак падобныя дзеянні хутка стануць бессэнсоўнымі: у лютым уступае ў моц заканадаўчы акт, згодна з якім людзям будзе неабходна чакаць 5 гадоў пасля таго, як яны набудуць статус маючых патрэбу ў паляпшэнні жыллёвых умоў.

Жынгель таксама паведаміў, што ў Мінскай вобласці востра стаіць праблема незаконнага выдзялення надзелаў у ахоўных зонах трубаправодаў, чыгуначных шляхоў. Пракуратуры даводзіцца забіраць такія надзелы. Як правіла, наўзамен грамадзянам даецца зямля ў іншых месцах.