Новы старшыня ПАРЕ спадзяецца на аднаўленне статусу спецзапрошанага для Беларусі

Источник материала:

Новы старшыня Парламенцкай асамблеі Рады Еўропы Меўлют Чавушаглу, абраны на гэтую пасаду 25 студзеня, спадзяецца, што ў 2010 годзе беларускаму парламенту будзе вернуты статус спецыяльнага запрошанага ў ПАРЕ.

«Беларусь — гэта адзіная краіна на еўрапейскім кантыненце, якая не з’яўляецца чальцом Рады Еўропы», — заявіў ён сёння на сваёй першай прэс‑канферэнцыі ў Страсбургу.

Нагадаем, у чэрвені 2009 года ПАРЕ прыняла рэзалюцыю аб вяртанні Беларусі статусу спецыяльнага запрошанага ў асамблеі пры ўмове ўвядзення ў краіне мараторыю на смяротную кару.

Прадстаўнік Турцыі ўпершыню абраны старшынёй Парламенцкай асамблеі Рады Еўропы. Раней яе ўзначальваў іспанец Луіс Марыя дэ Пуч.

Кажучы аб сваёй працы на новай пасадзе, Чавушаглу зазначыў, што будзе надаваць асаблівую ўвагу пытанням абароны каштоўнасцяў ПАРЕ і правоў чалавека, а таксама рэформе Рады Еўропы і Еўрапейскага суда па правах чалавека.

***

Меўлют Чавушаглу нарадзіўся 5 лютага 1968 года. У ПАРЕ — з 2003 года. З 2007 года з’яўляўся старшынёй турэцкай дэлегацыі ў ПАРЕ і адначасова намеснікам старшыні асамблеі. Уваходзіць у групу «Еўрапейскіх дэмакратаў». Раней працаваў у камітэце па маніторынгу абавязацельстваў перад Радай Еўропы і ў прававым камітэце. Чавушаглу таксама быў дакладчыкам па праблеме голаду на Украіне ў 1930‑я гады.