Чаму Арлову не далі выступіць на гістфаку?

 

“Недзе 10 дзён таму мне патэлефанавалі студэнты гістфака ды запрасілі на творчую сустрэчу - падзяліцца ўражаннямі пра студэнцкае жыццё, - распавёў нам Уладзімір Арлоў. - Я прапанаваў прымеркаваць сустрэчу да міжнароднага Дня пісьменніка, які ва ўсім свеце адзначаюць 3 сакавіка. Таксама мы збіраліся зрабіць прэзентацыю новага выдання маёй кнігі “Імёны свабоды”. Праз пару дзён ініцыятары паведамілі мне, што ў дэканаце адмовіліся праводзіць сустрэчу, бо ў гэты дзень на гістфаку шмат мерапрыемстваў. Да таго ж летась, маўляў, на Дні роднай мовы я ўжо там выступаў”. 

 

Каб атрымаць інфармацыю з першых рук, мы звярнуліся да кіраўніцтва факультэта. Намеснік дэкана Лідзія Бярэйшык распавяла карэспандэнту TUT.BY, што “ў студэнтаў, сапраўды, была размова пра запрашэнне Арлова, аднак на сакавік нічога не планавалася”. Да таго ж яна паведаміла, што ўчора на факультэце праходзіла вялікая канферэнцыя сумесна з музеем Вялікай Айчыннай вайны, прысвечаная пытанням калекцыянавання і яго ўплыву на патрыятычнае выхаванне, секцыі якой працавалі дапазна. 

 

 

- Ну, як у студэнтаў ёсць жаданне, мы не супраць, - адказвае Лідзія Бярэйшык. - Толькі, можа, не ў бліжэйшы час, а крыху пазней, бо мы з Арловым сустракаліся год назад. Усе, хто хацеў, задаваў пытанні, у газетах друкавалі інтэрв’ю. Зараз нашы планы перагружаны разнастайнымі мерапрыемствам, ды і не можам мы толькі з Арловым сустракацца. Іншыя студэнты вось прапануюць з Мазай (Ніна Мазай - старшыня Пастаяннай камісіі Савету Рэспублікі па міжнародных справах і нацыянальнай бяспецы - TUT.BY) сустрэцца - пераносілі ўжо некалькі разоў… 

 

 

- Не, мы з павагай да яго ставімся, ён адклікаецца на прапановы студэнтаў. Праўда, атрымліваецца, што сустракаліся, гутарылі, а ўрэшце ў інтэрнэт выстаўляюць не тыя каштоўныя погляды, якія ён выказаў, а прыколы, з чаго студэнты робяць высновы, што была адна забава. Гэта часам робіць антырэкламу справе. Пра сур’ёзнае ў інтэрнэце, на жаль, не пішуць (??? — TUT.BY). Нашы студэнты хоць і глыбокія людзі, але рознае бывае, - заключыла намесніца дэкана. 

 

Нагадаем, Уладзімір Арлоў, аўтар бестселераў “Таямніцы полацкай гісторыі”, “Адкуль наш род”, “Краіна Беларусь” і іншых, скончыў гістфак БДУ ў 1975 годзе. У 1997-м пісьменніка звольнілі з пасады галоўнага рэдактара выдавецтва “Мастацкая літаратура” “за выпуск исторической и другой сомнительной литературы".