Даходы насельніцтва павялічыліся на 5,4 працэнта

Источник материала:

Пра гэта ўчора паведаміў намеснік міністра эканомікі Анатоль Філонаў. Паводле вынікаў першага квартала ўзровень павелічэння ўнутранага валавога прадукту склаў 104 працэнты. Рост прадукцыі ў прамысловасці дасягнуты ў памеры 105,9 працэнта, у сельскай гаспадарцы — 105,3 працэнта. Рознічны таваразварот павялічыўся на 13,3 працэнта, а платныя паслугі насельніцтву — на 5,7 працэнта.

Усяго за квартал сем найбуйнейшых галін прамысловасці адпрацавалі з плюсам. Асноўны рост эканамічных паказчыкаў назіраўся ў электраэнергетыцы (112,7 %), хімічнай і нафтахімічнай галіне (129,5 %) і лёгкай прамысловасці (109,4 %). На ўзровень мінулага года падцягнулася машынабудаўнічая галіна (100,9 %).

Зніжэнне вытворчасці назіраецца ў паліўным сектары эканомікі, што звязана з недапастаўкай сыравіны ў нафтаперапрацоўчы комплекс краіны. У першым квартале загрузка беларускіх НПЗ склала ўсяго 66 працэнтаў. Справа ў тым, што сёлета істотна змяніліся ўмовы пастаўкі расійскай нафты ў нашу краіну. Расійскія пастаўшчыкі пастаўляюць у Беларусь бяспошлінную нафту толькі для ўнутраных патрэбаў. А вось з улікам пошліны кошт расійскай нафты павялічваецца ажно ў два разы. Перапрацоўваць нафту па такім кошце айчынным заводам ужо амаль немэтазгодна.

Рэнтабельнасць вытворчасці ў прамысловасці склала цяпер 7,5 працэнта, а па выніках года яе магчыма павялічыць да 10 працэнтаў, упэўнены Анатоль Філонаў.

За квартал прадукцыйнасць працы ў рэальным сектары эканомікі павялічылася на 8,4 працэнта. Гэта дазваляе істотна павялічваць рэальныя заробкі работнікам. Так, па выніках першых двух месяцаў намінальны заробак у прамысловасці склаў 1 млн 16 тысяч рублёў, што на 10,3 працэнта вышэй за леташні ўзровень. Заробкі ў народнай гаспадарцы будуць і далей павялічвацца такімі тэмпамі, каб напрыканцы года яны дасягнулі ўзроўню 500 долараў у валютным эквіваленце, запэўніў намеснік міністра.

Сяргей КУРКАЧ.