Аляксандр ЖУК: Праз некалькі гадоў ВНУ будуць змагацца за сваіх абітурыентаў

Источник материала:

На нарадзе адказных сакратароў прыёмных камісій ВНУ першы намеснік міністра адукацыі Аляксандр Жук папрасіў звярнуць увагу абітурыентаў на тую акалічнасць, што самая праўдзівая і поўная інфармацыя для тых, хто паступае ў ВНУ, утрымліваецца ў даведніку, выпушчаным дзяржаўным выдавецтвам "Вышэйшая школа ". Гэты даведнік з'явіўся ў кнігарнях адносна нядаўна, затое прадукцыя прыватных выдавецтваў, разлічаная на абітурыентаў узору 2010 года, запоўніла паліцы кнігарняў і шапікаў яшчэ некалькі месяцаў таму.

— Даведнікі іншых выдавецтваў могуць утрымліваць недакладную інфармацыю аб прыёме на 2010 год, паколькі галоўная мэта некаторых выдавецтваў — зарабіць грошы, а для гэтага трэба першымі выдаць даведнікі. Таму часта ў такіх даведніках публікуецца не ўзгодненая з ВНУ інфармацыя, напрыклад, парадак прыёму за папярэдні год аўтаматычна пераносіцца на гэты год, — патлумачыў Аляксандр Жук. — У мінулым годзе ў нас былі выпадкі, калі абітурыенты прадстаўлялі ў прыёмныя камісіі даведнікі, выпушчаныя двума прыватнымі выдавецтвамі, якія ўтрымлівалі недакладныя звесткі аб парадку прыёму ў некаторыя вышэйшыя каледжы. Для прыёмнай камісіі галоўны дакумент — гэта даведнік для абітурыентаў выдавецтва "Вышэйшая школа": толькі гэтай інфармацыі можна давяраць і выкарыстоўваць яе ў сваёй рабоце.

Аляксандр Жук папярэдзіў прадстаўнікоў вышэйшых навучальных устаноў аб тым, што ў найбліжэйшыя гады канкурэнцыя паміж ВНУ за свайго абітурыента сур'ёзна абвострыцца. Прычына гэтай незвычайнай з'явы для нашай краіны, дзе попыт на вышэйшую адукацыю традыцыйна перавышае фізічныя магчымасці ВНУ, крыецца ў дэмаграфіі. Сёлета колькасць выпускнікоў агульнаадукацыйных школ зменшыцца ў параўнанні з папярэднім годам на 10,8 тысячы чалавек: са сцен школы выйдуць у дарослае жыццё 88,2 тысячы маладых людзей. Таму выкананне запланаваных паказчыкаў прыёму на гэты год (а план быў павялічаны на 4,9 тысячы месцаў) патрабуе значных намаганняў для прыцягнення абітурыентаў у ВНУ. У наступныя ж гады колькасць выпускнікоў таксама будзе істотна змяншацца: да 2014 года выпуск скароціцца больш чым на трэць і складзе менш як 60 тысяч чалавек (у 2011 годзе — 79,5 тысячы, 2012 годзе — 65,3 тысячы, 2013 годзе — 61,6 і ў 2014 годзе — 57,9 тысячы).

— Не трэба скідваць з рахункаў і расійскія ВНУ, асабліва ў прыгранічных раёнах, якія на самых выгадных умовах завабліваюць абітурыентаў з Беларусі, — дадаў Аляксандр Жук. — Таму ваша задача, калегі, сканцэнтраваць намаганні на правядзенні прафарыентацыйнай работы, прыцягненні абітурыентаў не толькі з Беларусі, але і з іншых краін з мэтай фарміравання паўнавартаснага кантынгенту студэнтаў і забеспячэння нармальнага функцыянавання ўстаноў адукацыі. Правіламі прыёму створаны самыя спрыяльныя ўмовы для залічэння замежных грамадзян, якія могуць падаваць свае дакументы да 15 кастрычніка. У 2009 годзе на ўсе формы навучання ў беларускія ВНУ былі залічаны 2798 замежных грамадзян, што на 37,5 працэнта больш, чым у 2008 годзе. Але мы не павінны спыняцца на дасягнутым! Трэба актыўна прапагандаваць нашу сістэму адукацыі і прасоўваць свае прапановы на рынак адукацыйных паслуг за мяжой.

Дарэчы, сёлета ажыццяўляць падрыхтоўку спецыялістаў з вышэйшай адукацыяй будуць у Беларусі і дзве новыя ўстановы: Інстытут пагранічнай службы, створаны згодна з Указам Прэзідэнта Рэспублікі Беларусь ад 5 мая 2010 года № 237, і Магілеўскі каледж Міністэрства унутраных спраў Рэспублікі Беларусь, які быў перайменаваны ў Вышэйшы каледж МУС. Цяпер тут распачнецца падрыхтоўка курсантаў з вышэйшай адукацыяй: 100 чалавек плануецца прыняць на дзённую і 100 чалавек — на завочную форму навучання.

Усяго ў 2010 годзе на ўзровень вышэйшай адукацыі на ўсе формы атрымання адукацыі ў дзяржаўныя і прыватныя ўстановы адукацыі запланавана прыняць 102,7 тысячы чалавек, у тым ліку на дзённую форму навучання — 54,4 тысячы і на завочную — 48,1 тысячы.

На навучанне за кошт сродкаў бюджэту запланавана прыняць 33,9 тысячы чалавек, што перавышае паказчык мінулага года на 854 бюджэтныя месцы. Прыём ў ВНУ Міністэрства адукацыі павялічаны на 350 бюджэтных месцаў (пераважна на спецыяльнасці тэхніка-тэхналагічнага профілю), у ВНУ Міністэрства культуры — на 30 месцаў, Міністэрства спорту — на 10, а у ВНУ Міністэрства ўнутраных спраў — на 400 чалавек.

Аляксандр Жук паведаміў, што з 17 мая ў Міністэрстве адукацыі пачне працаваць тэлефонная "гарачая лінія "Абітурыент-2010". Кожны год "тройка" дзяжурных на "гарачым" тэлефоне змяняецца. Кансультаваць абітурыентаў па ўсіх нюансах прыёмнай кампаніі будуць сёлета кампетэнтныя спецыялісты з БДЭУ, Беларускага дзяржаўнага педагагічнага ўніверсітэта і БДУІР. Уведзеная практыка такой арганізацыі работы цалкам апраўдала сябе ў папярэднія гады, дарэчы, нагрузка на "гарачую лінію" год ад года змяншаецца, чаму спрыяюць стабільныя правілы прыёму ў ВНУ і сумленная работа членаў прыёмных камісій. Тэлефон "гарачай лініі" (017) 222 43 12. "Гарачая лінія" працуе з 9 гадзін раніцы да 18 гадзін.

Надзея НІКАЛАЕВА.