Зялёнае святло — хуткасці і камфорту

Источник материала:

Мінск і абласныя цэнтры краіны звяжуць цягнікі, здольныя пераадольваць да 160 кіламетраў за гадзіну
Як паведаміў першы намеснік кіраўніка пасажырскай службы Беларускай чыгункі Яўген Пушак, запланаваны шэраг мер для таго, каб цягнікі змаглі рухацца з большай хуткасцю. На першым этапе Мінск і абласныя цэнтры краіны звяжуць цягнікі, здольныя пераадолець да 160 кіламетраў за гадзіну. "У першую чаргу цягнікі з такой хуткасцю будуць курсаваць у напрамку Брэста, — удакладніў спецыяліст. — Ужо сёння на асобных участках гэтага кірунку яны развіваюць па 140, у будучыні стаіць задача павялічыць хуткасць да 160, а потым і да 200 кіламетраў за гадзіну".
Яўген Пушак адзначыў, што павышэнне хуткасці пасажырскіх цягнікоў у міжабласных зносінах на ўчастках агульнаеўрапейскіх транспартных калідораў дасць магчымасць значна скараціць час іх руху, павысіць камфорт і якасць чыгуначнага сервісу.
Гаворачы аб перспектывах развіцця гарадскага хуткаснага руху, Яўген Пушак нагадаў: ужо ў наступным годзе Беларуская чыгунка запусціць звышкамфартабельную гарадскую электрычку паміж станцыямі "Мінск-Пасажырскі" і "Ждановічы". Гэту адлегласць цягнік, які ўмяшчае 555 пасажыраў, будзе пераадольваць за 15-16 хвілін. Інтэрвал руху на першым этапе складзе 20-25 хвілін. “Беларуская чыгунка заключыла кантракт на пастаўку 10 сучасных электрапаяздоў са швейцарскай кампаніяй “Штадлер”, — адзначыў спецыяліст. — І ўжо вядзецца будаўніцтва дадатковага чыгуначнага палатна ў напрамку станцыі “Ждановічы”, па якім будзе хадзіць адна з новых электрычак”.

Вольга Бяляўская