Ліквідацыя наступстваў аварыі на ЗАТ "Пінскдрэў" працягваецца

Источник материала:

Як паведамлялася, 25 кастрычніка на тэрыторыі ЗАТ "Пінскдрэў" адбыўся выбух. Быў разбураны цэх па вырабе драўнянастружкавых пліт (будынак памерам 36x126 м, аднапавярховы, цагляны, перакрыцці жалезабетонныя). Ад выбуху абвалілася 100 м 2 перакрыццяў і 400 м 2 сцен.

Пацярпелі работнікі цэха. Загінуў 26-гадовы аператар цэха, а пазней з-пад завалаў дасталі загінулага слесара-рамонтніка. Ноччу ў бальніцы памёр яшчэ адзін чалавек. Такім чынам ад выбуху загінула ўжо трое.

Пацярпелыя, а іх на сёння 18 чалавек, знаходзяцца ў бальніцах Мінска, Брэста і Пінска. У большасці пацярпелых тэрмічныя апёкі 3-4 ступені 60% цела, стан іх цяжкі, а трое рабочых знаходзяцца ў вельмі цяжкім.

Па інфармацыі прэс-службы МНС, існуе меркаванне, што прычынай выбуху маглі быць адкладанні драўнянага пылу ў выніку парушэння эксплуатацыі абсталявання па вытворчасці драўняна-паліўных гранул.

На ліквідацыі наступстваў выбуху працавала 34 адзінкі тэхнікі і 121 чалавек. З-пад завалаў выратавалі аднаго чалавека. На месцы здарэння працуюць камісія па надзвычайных сітуацыях Пінскага гарвыканкама, МНС і следчая група пракуратуры Брэсцкай вобласці.

Кіраўніцтва ЗАТ "Пінскдрэў" прыняло рашэнне аказаць матэрыяльную дапамогу сем'ям загінулых і пацярпелых падчас аварыі. "Пінскдрэў" бярэ на сябе ўсе затраты па пахаванні загінулых. Іх сем'ям будзе выплачана аднаразовая матэрыяльная дапамога ў памеры 10 млн рублёў, а пацярпелым — па 3 млн рублёў. Акрамя гэтага, ад "Белдзяржстраха" пацярпелыя атрымаюць страхавыя сумы.

Сымон Свістуновіч.