Міліцыя ўжыла супраць жанчыны фізічную сілу

Источник материала:

Гэта гісторыя адбылася ў жніўні. Тады дзеля бяспекі кіраўніка дзяржавы супрацоўнікі міліцыі патрабавалі ў 40-градусную спёку зачыніць форткі жыхароў аднаго з дамоў у сталічным мікрараёне «Вяснянка». Адной з жыхарак, якая адмовілася падпарадкавацца гэтаму загаду, не пашанцавала. Паводле яе словаў, узвод міліцыі Цэнтральнага раёна Мінска ўварваўся ў яе кватэру і прымяніў фізічную сілу.

Пацярпелая Алена Засценчык, выкладчык аднаго са сталічных ВНУ, лічыць, што толькі пад ціскам суседзяў, якія чулі штурм яе кватэры і выйшлі на калідор, супрацоўнікі міліцыі перасталі выкручваць ёй рукі. Жанчына звярнулася з заявай у пракуратуру Цэнтральнага раёна.

Праваабаронца Сяргей Усцінаў, які дапамагаў Алене ў складанні скаргі, тлумачыць:

«Само патрабаванне супрацоўнікаў міліцыі зачыніць форткі не заснавана на законе.

а недатыкальнасць жылля з’яўляецца неад’емным Канстытуцыйным правам грамадзянаў».

Пацярпелая атрымала нядаўна адказ з пракуратуры Цэнтральнага раёна. Там не пабачылі ў міліцэйскіх дзеяннях прыкметаў злачынства.

«Праверка, якая праводзіцца пракуратурай Цэнтральнага раёна, з’яўляецца не поўнай, не аб’ектыўнай і не ўсебаковай. Першапачаткова пацярпелай не было выдадзена накіраванне на праходжанне судовай медыцынскай экспертызы, не былі апытаны суседзі, якія бачылі адбывалае,« — заявіў праваабаронца Сяргей Усцінаў. — Мы ўжо падалі скаргу на адмову ў завядзенні крымінальнай справы ў пракуратуру горада Мінска, і будзем далей дамагацца аб’ектыўнага расследавання гэтай справы» .

Варта адзначыць, на ўсебеларускім народным сходзе Лукашэнка зазначыў, што «галоўным прынцыпам дзейнасці органаў унутраных спраў павінна быць ветлівае і ўважлівае стаўленне да людзей. (…) Людзі не павінны баяцца міліцыі, а павінны бачыць у іх памагатых і абаронцаў».