Які ж Новы год без паху хвоі?

Источник материала:

Лясгасы прапануюць і букеты, і дрэвы ў кадках

Сёлета да зімовых святаў лясгасы падрыхтуюць для продажу каля 200 тысяч навагодніх дрэў. Ёлачныя кірмашы распачнуць сваю працу ў сталіцы, ва ўсіх абласных і раённых цэнтрах пасля 20 снежня. Усяго па краіне плануецца арганізаваць больш за 600 гандлёвых кропак па рэалізацыі навагодніх дрэў. Можна будзе набыць іх і ў лясніцтвах.

Цэны на адзін з галоўных атрыбутаў зімовага свята будуць прымальнымі, паведаміла рэдакцыі прэс-сакратар Міністэрства лясной гаспадаркі Ружэна Навіцкая. У лясгасах ці лясніцтвах ёлка вышынёй да аднаго метра будзе каштаваць каля 23 тысяч рублёў (у гандлі — 30 тысяч рублёў), дрэва ад метра да двух — 30 тысяч (у гандлёвых кропках — 39 тысяч), ад двух да трох метраў — 43 тысячы (на кірмашах — 55-56 тысяч рублёў). Самымі дарагімі будуць навагоднія дрэвы вышынёй звыш дзесяці метраў: у лясгасах і лясніцтвах за іх давядзецца заплаціць 235 тысяч рублёў, на гандлёвых кропках — 306 тысяч рублёў (тут усе цэны ўказаныя з улікам ПДВ у памеры 20 працэнтаў; пры набыцці навагодніх дрэў фізічнымі асобамі ў лясніцтве ці лясгасе ПДВ не бярэцца).

Традыцыйна ў продажы будуць і сосны. Некаторыя лясгасы падрыхтавалі для ахвотных і ёлкі ў кадках. Кошт апошніх складзе каля 80 тысяч рублёў за дрэва вышынёй да аднаго метра. На кірмашах таксама будуць прадавацца букеты з галінак, каштаваць яны будуць ад 2 да 5 тысяч рублёў.

На ўнутраным рынку з вышэйназванай колькасці навагодніх дрэў плануецца рэалізаваць не менш за 170 тысяч. Каля 10 тысяч, як мяркуецца, пойдзе на экспарт. Летась у Расію было экспартавана 1,5 тысячы навагодніх ёлак. Смаргонскі доследны лясгас адгружаў іх у Санкт-Пецярбург, Брэсцкі лясгас — у Маскву. Сёлета адтуль зноў актыўна сталі паступаць заяўкі. У залежнасці ад якасці і вышыні дрэва "экспартны варыянт" навагодняй ёлкі будзе каштаваць ад 8 да 12 долараў. Асобныя лясгасы падрыхтавалі для продажу ў Расію і дрэвы ў кадках — па цане да 100 долараў.

Сяргей РАСОЛЬКА.