Віртуальнае залічэнне абітурыентаў, або Тэст для распрацоўкі спецыялістаў БДУІР

Источник материала:

Што значыць быць віртуальна залічаным? Гэтае пытанне цікавіць сёння ўсіх абітурыентаў, якія ўпершыню пачулі пра мадэльную апрабацыю аўтаматызаванай сістэмы падачы заяў і залічэння ў ВНУ ў віртуальным рэжыме.

Нагадаем, што падчас будучай прыёмнай кампаніі да эксперымента, які стартаваў у Беларускім дзяржаўным універсітэце інфарматыкі і радыёэлектронікі, далучацца яшчэ шэсць беларускіх ВНУ — Беларускі нацыянальны тэхнічны ўніверсітэт, Беларускі дзяржаўны тэхналагічны ўніверсітэт, Брэсцкі дзяржаўны тэхнічны ўніверсітэт, Гродзенскі дзяржаўны ўніверсітэт імя Я.Купалы, Гомельскі дзяржаўны ўніверсітэт імя Ф.Скарыны і Полацкі дзяржаўны ўніверсітэт. Абітурыентам, якія падаюць дакументы ў гэтыя ВНУ на дзённую бюджэтную форму навучання, будзе прапанавана прайсці анкетаванне і ўказаць 5 прыярытэтных варыянтаў для паступлення.

— Летась пры падачы дакументаў абітурыенты БДУІР указвалі дзве або тры спецыяльнасці ў парадку расстаноўкі ўласных прыярытэтаў: абітурыенты тэхніка-тэхналагічнага профілю — тры, а інжынерна-эканамічнага профілю — дзве, — расказаў на сустрэчы з журналістамі рэктар БДУІР Міхаіл БАТУРА. — Спачатку абітурыент са сваім наборам сертыфікатаў удзельнічаў у конкурсе на спецыяльнасць, указаную ў прыярытэтах першай, а затым — па другой і трэцяй спецыяльнасцях. Аўтаматызаваная сістэма залічэння дазволіла абітурыентам максімальна выкарыстаць усе шанцы для паступлення ў ВНУ. Да таго ж абітурыентам з добрай падрыхтоўкай, якія вытрымалі агульны конкурс па ўніверсітэце, але пры гэтым не прайшлі па конкурсе ні на адну з указаных у заяве спецыяльнасцяў, было прапанавана паступіць на іншую спецыяльнасць, дзе заставаліся вакантныя месцы. У выніку больш як 90% нашых абітурыентаў вынікамі залічэння засталіся задаволеныя. А ў апошні дзень падачы дакументаў ужо праз 15 хвілін пасля закрыцця дзвярэй прыёмнай камісіі фармальна залічэнне было завершана. Для гэтага было дастаткова толькі націснуць на камп'ютарную клавішу, і аўтаматызаваная сістэма размеркавала ўсіх у адпаведнасці з агучанымі прыярытэтамі.

Аднак, у адрозненне ад абітурыентаў БДУІР, для якіх залічэнне з дапамогай аўтаматызаванай сістэмы было абсалютна рэальным, для абітурыентаў ВНУ, якія далучацца ў гэтым годзе да эксперымента, залічэнне будзе, на жаль, віртуальным.

— Справа ў тым, што аўтаматызаваная сістэма залічэння стваралася непасрэдна пад нас, а цяпер яе трэба адаптаваць і пад іншыя ВНУ, — патлумачыў дэкан факультэта даўніверсітэцкай падрыхтоўкі і прафесійнай арыентацыі БДУІР Віталь РУСІН. — Для таго, каб запусціць гэтую сістэму ў маштабах усёй краіны, трэба быць упэўненымі ў яе надзейнасці. Сур'ёзнай праблемай, напрыклад, пры аўтаматызаваным залічэнні з'яўляецца існаванне асобнага конкурсу для гарадской і сельскай моладзі. Патрабуюць уніфікацыі і ўнутраныя парадкі прыёму ў ВНУ, існаванне розных "мясцовых" нюансаў і паўпрахадных балаў. Так, ва ўнутраным парадку прыёму ў канкрэтную ВНУ можа ўтрымлівацца больш як з дзясятак пунктаў з пералічэннем асоб, якія маюць пераважнае права на залічэнне пры аднолькавай колькасці балаў. Улічыць іх усе ў аўтаматызаванай сістэме праблематычна, асабліва калі сярод згаданых абітурыентамі прыярытэтаў будуць указвацца спецыяльнасці, якія знаходзяцца ў розных ВНУ. Пакуль у эксперыменце будуць задзейнічаны толькі два профілі падрыхтоўкі спецыялістаў: тэхніка-тэхналагічны і эканамічны. Міністэрства адукацыі зараза вызначаецца з пералікам спецыяльнасцяў.

Як гэта будзе выглядаць на практыцы? Абітурыенту, які прынёс свае дакументы, напрыклад, у БНТУ, прапануюць запоўніць анкету і ўказаць у ёй да пяці прыярытэтаў залічэння (варыянты паступлення могуць указвацца як у рамках адной ВНУ, так і ў рамках усіх ВНУ, задзейнічаных у эксперыменце). Дарэчы, ад запаўнення анкеты можна будзе адмовіцца. А камп'ютарная праграма сама будзе падлічваць, куды і на якую спецыяльнасць абітурыент можа паступіць са сваім наборам сертыфікатаў. Аднак у гэтым годзе віртуальнае залічэнне не будзе мець ніякай сілы і будзе праходзіць паралельна са звычайным. Гэта значыць, што калі абітурыент падаў у БНТУ заяву на пэўную спецыяльнасць, то толькі на яе ён і зможа паступіць. Але ўся інфармацыя пасля завяршэння прыёму дакументаў, як і вынікі залічэння, затым паступяць у БДУІР, спецыялісты якога зоймуцца апрацоўкай даных і звераць вынікі свайго "віртуальнага" залічэння з рэальным. Параўнаюць, наколькі супалі імкненні і жаданні абітурыентаў з рэчаіснасцю. І якія б магчымасці ў іх былі для залічэння, калі б аўтаматызаваная сістэма працавала не ў віртуальным рэжыме.

Калі ўсё пройдзе гладка, то, магчыма, што падчас прыёмнай кампаніі 2013 года аўтаматызаваная сістэма падачы заяў і залічэння зможа запрацаваць ужо па-сапраўднаму. На думку кіраўніцтва БДУІР, аўтаматызаваная сістэма залічэння ў большай ступені адпавядае ідэям прафарыентацыі моладзі, паколькі калі абітурыент хоча стаць фізікам або матэматыкам, праграмістам ці эканамістам, то ён не стане ўказваць у прыярытэтах далёкую ад сваіх схільнасцяў спецыяльнасць. Магчыма, ён не пройдзе па конкурсе ў сталічную ВНУ, затое атрымае шанц вучыцца ў рэгіянальнай ВНУ па спецыяльнасці, якую ён абраў свядома, а не стыхійна, імкнучыся ўгадаць, куды ёсць шанцы трапіць са сваімі баламі. Хоць не сакрэт, што ў многіх рэгіянальных ВНУ апошнім часам назіраюцца конкурсы нават большыя, чым у сталіцы. З іншага боку, такім чынам можна будзе скласці рэальную карціну рэйтынгу ВНУ і запатрабаванасці тых ці іншых спецыяльнасцяў у моладзі.

Трэба дадаць, што ў БДУІР колькасць пададзеных летась на дзённую форму заяў узрасла. На трэць узраслі і прахадныя балы, а па выніках трох атэстацый, праведзеных у першым вучэбным семестры, першакурснікі прадэманстравалі лепшыя поспехі ў вучобе, чым іх папярэднікі. Як паказала практыка, абітурыенты вельмі станоўча ставяцца да таго, што ў іх ёсць магчымасць указаць пры падачы дакументаў не адну, а некалькі спецыяльнасцяў. Пры такім падыходзе да залічэння абітурыенты не баяцца падаваць дакументы на прэстыжныя спецыяльнасці з высокім конкурсам, бо ў выпадку няўдачы яны не застаюцца "за бортам"...

Надзея НІКАЛАЕВА.

Плюсы ўкаранення аўтаматызаванай сістэмы залічэння:

üмагчымасць удзельнічаць у конкурсе на некалькі спецыяльнасцяў ВНУ з улікам іх прыярытэтнасці;

üмагчымасць аўтаматызаваць працэс прыёму заяў і залічэння і такім чынам істотна павысіць прапускную здольнасць і эфектыўнасць работы прыёмнай камісіі. Роля персаналу прыёмнай камісіі абмяжоўваецца фарміраваннем базы даных абітурыентаў для правядзення конкурсу, што забяспечвае карэктнасць залічэння;

üмагчымасць звесці два ізаляваныя працэсы прыёмнай кампаніі (рэгістрацыю на ЦТ і падачу дакументаў у ВНУ) у адзін з істотным зніжэннем выдаткаў;

üскарачэнне тэрмінаў прыёмнай кампаніі ў ВНУ.