Хто і навошта псуе сертыфікаты па ЦТ?

Ужо два гады Рэспубліканскі інстытут кантроля ведаў ня ведае, што рабіць з “бракаванымі” сертыфіктамі. “Мы нават ствараем аператыўную групу з ліку супрацоўнікаў РІКВ, якія два-тры тыдні працуюць толькі на замене сертыфікатаў”. На гэта скардзіцца дырэктар РІКВ Мікалай Фяськоў у заяве, змешчанай на афіцыйным сайце інстытута.

Справа ў тым, што ўжо другі год, калі надыходзіць пара падачы дакументаў (у т.л. сертыфікатаў цэнтралізаваннага тэсціравання) у ВНУ, шмат абітурыентаў зноў ідзе ў РІКВ – за тым, каб атрымаць іншы сертыфікат бо той, што выдалі, маўляў, не бяруць. Улічваючы досвед мінулых гадоў, "мы нават ствараем аператыўную групу з ліку супрацоўнікаў РІКВ, якія два-тры тыдні працуюць толькі на замене сертыфікатаў".

Напрыклад, некалькі дзён таму абітурыентка-мінчанка звярнулася ў інстытут, каб замяніць адразу два сертыфікаты – па рускай і англійскай мовах. “Абодва сертыфікаты былі сапсаваны падчас спробы сцерці надрукаваныя лічбы. І маляваць іншыя лічбы ўжо не мела ніякага сэнсу, бо грубая падробка адразу кідаецца ў вочы, - кажа Мікалай Фяськоў. - Натуральна, прыёмная камісія аднаго з універсітэтаў Мінска не прыняла гэтыя сертыфікаты. Давялося абітурыентцы разам з маці звяртацца ў наш інстытут за заменай сертыфікатаў з падрыхтаванай версіяй пашкоджвання дакумента”.
 

Аднак больш за ўсё ўразіла маці дзяўчыны (і гэта не першы выпадак упрактыцы РІКВ), якая “абараняючы” дачку, настойвала на тым, што сапсаваныя сертыфікаты былі выдадзены ў пункце тэсціравання, таксама гаворыцца ў звароце Мікалая Фяськова.” Зразумець паводзіны маці ў гэтай сітуацыі цяжка. Няёмка адчувалі сябе і супрацоўнікі інстытута, слухаючы жанчыну, якая з абурэннем і пагрозамі адстойвала сваю версію пашкоджвання сертыфікатаў. Каб гэты ўрок не быў такі горкі для дзяўчыны, мы выдалі ёй новыя сертыфікаты. Толькі ці зробіць яна правільныя высновы на будучыню?”.
 

Дарэчы, абгрунтаванне звароту: “Нам выдалі бракаваныя сертыфікаты” – адно з самых распаўсюджаных. “Такія сцвярджэнні не вытрымліваюць ніякай крытыкі. На ўсіх этапах афармлення сертыфікатаў як у інстытуце, так і ў пунктах тэсціравання, дзе праходзіць іх выдача абітурыентам, ніхто не мае магчымасці штосьці выправіць уручную, - кажа Фяськоў. - Цяжка нават уявіць такую мізансцэну: супрацоўнік пункта тэсціравання перад тым, як выдаць сертыфікат яго ўладальніку, лязом у бланку строгага ўліку, якім з’яўляецца сертыфікат, выразае надрукаваныя літары і лічбы”.
 

Звяртаючыся да абітурыентаў, Фяськоў падкрэслівае: усялякія маніпуляцыі з дакументамі і спробы іх падробак не змогуць дапамагчы. Больш за тое, апісаныя вышэй дзеянні асобных абітурыентаў ніяк не палепшаць іх рэйтынгавае становішча. Трэба ведаць, што такія дзеянні з бланкамі строгага ўліку супярэчаць патрабаванням заканадаўства”.
 

Каб даведацца падрабязней, што пагражае парушальнікам, у якім выпадку можна адназначна сцвярджаць, што працэс парушэння быў, у колькі абыходзіцца такое глупства самому РІКВ і, нарэшце, як часта ў апошнія два гады ў РІКВ звярталіся ды колькі было выдадзена “новых” сертыфікатаў, TUT.BY патэлефанаваў у сам інстытут. Аднак, як нам адказалі ў прыёмнай са спасылкай на намесніка Мікалая Фяськова, ніхто не можа нічога пракаментаваць, пакуль сам дырэктар не з’явіцца на працы 23 жніўня. Больш за тое, нам таксама адказалі, што зварот Фяськова быў надрукаваны ў “Настаўніцкай газеце” - якія яшчэ пытанні?