У Глыбокім дакапаліся да могілак, якія згадваюцца з XVI стагоддзя

Пасля Другой сусветнай вайны камуністы зноў стварылі турму ў беразвецкім кляштары. У 1949 годзе мясцовыя ўлады прызналі будынак царквы Нараджэння Дзевы Марыі ў Беразвеччы (помнік віленскага барока, 1763 год) аварыйным. Святыню пачалі разбіраць, а турэмная адміністрацыя выкарыстала частку цэглы, каб пабудаваць на беразвецкіх могілках жылыя дамы для сем'яў турэмнай аховы.

Падчас земляных прац у Глыбокім часта знаходзяць то рэшткі старых будынкаў, то чалавечыя парэшткі. Сёлета ў Беразвеччы былі адкапаныя падмуркі базыльянскай стайні, а ў 2012 годзе на скрыжаванні вуліц Замкавай (Леніна) і Азёрнай знайшлі парэшткі людзей, пахаваных побач з царквой Святой Тройцы.