Берасцейская моладзь арганізавала конкурс на лепшую бараду

Источник материала:

Падведзены вынікі конкурсу-забавы "Люблю бараду. Па Чорнаму". Арганізатарам незвычайнага спаборніцтва выступіў культурны цэнтр "Грунтоўня", што ў Берасці. У конкурсе маглі прыняць удзел усе аматары насіць бароды, а таксама дзяўчаты, якія сябруюць з барадатымі мужчынамі.

Удзельнікі рабілі і загружалі сэлфі "з барадой" і кароткім паведамленнем пра сябе. Вынікі падвялі ў Дзень закаханых, пад час закрыцця тыдня Мікалая Радзівіла Чорнага, мерапрыемства з гэтай нагоды ладзілася тут напярэдадні. Берасцейскі стараста, асветнік и мецэнат, выдавец Берасцейскай, ці Радзівілаўскай Бібліі, як вядома, меў раскошную бараду. Дарэчы, было некалькі намінацый: хлопец з файнай барадой (можна нават штучнай, каб толькі яна пасавала), дзяўчына з хлопцам, у якога ёсць барада.

Пераможцамі цікавага і незвычайнага маладзёжнага конкурсу сталі Арцём і Марыя (прозвішчы свае берасцейцы трымаюць у сакрэце). Яны атрымалі галоўны прыз - карціны-рэканструкцыі Берасця часоў Радзівіла з выставы "Асоба эпохі". Гэтыя вядомыя працы мастачкі Анастасіі Фяцісавай выстаўляліся ў "Грунтоўні" напярэдадні 500-годдзя Мікалая Радзівіла Чорнага.