А ў Башнях адбыўся “Водны фестываль”!

А возеру Будавець пашанцавала на любоў і клопат людзей, якія жывуць на яго берагах. Вось нядаўна жыхары аграгарадка Башні нават правялі ў гонар свайго возера “Водны фестываль”.

Адна з ідэйных натхняльнікаў і арганізатараў экалагічнага свята настаўніца Башнёўскай школы Марына Аляксеенка расказала, што фестывалю папярэднічала вялікая работа: уборка берагавой тэрыторыі, ачыстка яе ад сухіх і аварыйных дрэў, абсталяванне пляжнай зоны. У гэтую справу ўключыліся многія жыхары  Башнёў, прыходзілі цэлымі сем’ямі – Яўсейчыкі, Сафончыкі, Шур, Арловы, Вясна, Міраненкі і іншыя. А Аляксандр Пашкевіч не пашкадаваў уласнай бензапілы і сам папілаваў усе карчэўе.

Працавалі дружна, весела, было горача ва ўсіх сэнсах. І тут возера выручала – запрашала акунуцца, каб з новымі сіламі ўзяцца за работу. Потым Светласельскі сельсавет арганізаваў прывоз машыны пяску, і тут ужо дзеці знайшлі сабе занятак: і гулялі, і раскідвалі пясок, і прытоптвалі яго. Атрымалася такая прыгожая пляжная пляцоўка (“некаторыя называюць “каралеўскі пляж”, – смяецца Марына Аляксеенка).

Але прырода любіць выпрабоўваць чалавека, і літаральна дні за два да намечанага мерапрыемства каля Будавесці разгуляўся сапраўдны ўраган. Вецер правёў сваю рэвізію, пакінуўшы ў набярэжнай зоне паламаныя і пакарабачаныя дрэвы.

І зноў талака, і, галоўнае, кажа Марына Ягораўна, нікога не трэба было прасіць – самі ішлі. Кожны казаў: “Для сябе ж стараемся і для свайго возера”.

І ўрэшце свята – з гасцямі, песнямі і сюрпрызамі. Сюрпрызам для башнёўцаў стаў прыезд самадзейных артыстаў з Віцебска – 42 валанцёры з грамадскай арганізацыі “Залаты ўзрост” даведаліся пра фестываль і прывезлі ў Башні цудоўную канцэртную праграму, прычым, абсалютна бясплатна. На тое яны і валанцёры. Самі яны таксама засталіся задаволеныя: ад сустрэчы з гасціннымі жыхарамі аграгарадка і цудоўнымі краявідамі возера Будавесць, на фоне якога зрабілі не адзін здымак.

З канцэртам “На ўсіх ветразях” завітаў да суседзяў і аздараўленчы лагер “Пунсовы ветразь” з Лескавіч. А мясцовы клуб выйшаў на сцэну з тэатралізаванай пастаноўкай “Як Арцём ваду шукаў”. Нельга не сказаць, што былы кіраўнік узорнага тэатральнага калектыву  «Прэм’ера» Ірына Бондарава і загадчыца клуба Людміла Арэхава самі пашылі і звязалі роставыя лялькі і дэкарацыі для спектакля.

Работа фотазоны, інфармацыйнага стэнда грамадскага аб’яднання “Экабум”, выставы кніг, фотаздымкаў, дзіцячых малюнкаў, конкурсная праграма з віктарынай “Вадой не разальеш”…

І гэта яшчэ не ўсё. Работнікі раённага аддзела МНС не прапусцілі такі выпадак і прыехалі ў Башні з акцыяй “З клопатам пра бяспеку малой радзімы”, каб яшчэ і яшчэ раз нагадаць малым і дарослым быць асцярожнымі і абачлівымі на сушы і на вадзе.

Дарэчы, усе ўдзельнікі акцый, конкурсаў і забаў атрымалі прызы. Вось, напрыклад Яраслаў Бажанаў разам са сваёй бабуляй перамаглі ў конкурсе “Добрыя накрыўкі” – сабралі аж 2070 накрывак! А мы ўжо расказвалі на старонках газеты, што акцыя мае такую назву не проста так – грошы ад сабранага пластыку пойдуць на набыццё інвалідных крэслаў. Так што Яраславу і іншым удзельнікам конкурсу – пашана і падарункі: каму вядро для вады, каму энергазберагальную лямпачку, каму яшчэ якую карысную рэч.

– Дзе вы грошы бралі на прызы? – пытаюся ў М. Я. Аляксеенкі.

– Дык мы ж удзельнічалі ў чарговым конкурсе ініцыятыў, які праводзіў Офіс еўрапейскай экспертызы і камунікацый, перамаглі і нам вы-дзелілі грошы на правядзенне фестывалю.

– Ці многа, калі не сакрэт?

– Не сакрэт, і сума можа здацца сціплай – 200 беларускіх рублёў, але нам, як бачыце, хапіла. І на прызы, і на пакупку добрага казана, у якім мы наварылі смачнай юшкі і ўсіх гасцей пачаставалі ад душы. Прыязджайце да нас, мы і вам юшкі наварым…

Аліна ПЯТРОВА.

Фота з асабістага архіва Марыны АЛЯКСЕЕНКІ.

Надрукавана ў №53 ад 09.07.2019 г.

P. S. А Башні тым часам, дзякуючы зноў жа Марыне Аляксеенцы, выступілі з новай ініцыятывай: “Пляцоўка для ўсіх “Башні LIVE”. Увязаліся ў конкурс “Мясцовыя стратэгіі – права кожнага: укараненне падыходу, заснаванага на правах чалавека, у працэсе развіцця на мясцовым узроўні”, што фінансуецца Еўрасаюзам. І зноў атрымалі падтрымку. І хутка каля Башнёўскай школы ўстановяць альтанку, дзіцячы комплекс,  кантэйнеры для раздзельнага збору смецця… Але пра гэта мы раскажам у наступны раз.