Паспяховыя фінішы кіраўчанкі Паліны Конрад

У Магілёве прайшоў фінал рэспубліканскага першынства па веласпорце на шашы сярод дзіцяча-юнацкіх спартыўных школ. Аб гэтым расказаў старшы трэнер аддзялення веласпорту СДЮШАР Юрый Цішкоў. Для школьнікаў гэтыя спаборніцтвы лічацца самымі прэстыжнымі. Адпаведна ж прэстыжнымі з’яўляюцца і перамогі на іх. У сувязі з гэтым поспехамі па праву можа ганарыцца выхаванка аддзялення веласпорту СДЮШАР Паліна Конрад.

Усяго ў першынстве прыняло ўдзел 18 каманд з усіх спартыўных школ краіны, дзе культывуецца веласпорт. На Магілёўшчыне такіх чатыры: 2 — у Магілёве, па адной у Бабруйску і Кіраўску. У камандным заліку нашы прадстаўнікі занялі 10 месца.

У асабістым заліку щдала выступіла Паліна Конрад. У індывідуальнай гонцы з раздзельным стартам нашай юнай велагоншчыцы толькі крыху не хапіла да першага месца — у яе “срэбра”. А вось у гонцы-крытэрыуме ёй не было роўных: за яўнай перавагай яна стала чэмпіёнкай. Важкасці перамозе дадае той факт, што Паліна на 2 гады маладзей за большасць сваіх апанентак, а ўсяго ў гонках удзельнічала каля 50 велагонгншчыц. Гэта, у сваю чаргу, гаворыць пра істотны патэнцыял нашай юнай спартсменкі.

Зараз Паліна рыхтуецца да выступлення на наступнай рэспубліканскай спартакіядзе сярод ДЮСШ — цяпер ужо на трэку.