Найлепшы «выхавальнiк» — канкурэнцыя

Источник материала:

Як нас абслугоўваюць

Паводле iнфармацыi з iнспекцыi Мiнiстэрства па падатках i зборах па Гродзенскай вобласцi, сёлета з 1 студзеня да сярэдзiны кастрычнiка 568 разоў правяралiся Кнiгi заўваг i прапаноў у юрыдычных асоб i 922 — у прадпрымальнiкаў. Былi выяўлены адпаведна 33 i 112 парушэнняў.

Амаль палову парушальнiкаў папярэдзiлi, а за найбольш грубае iгнараванне ўстаноўленых у адносiнах да гэтых кнiг «правiлаў гульнi» прад’яўлены штрафныя санкцыi на агульную суму 6,3 мiльёна рублёў. Да прыкладу, нежаданне аднаго прадпрымальнiка з Лiды выдаць кнiгу каштавала яму 120 тысяч рублёў. Яшчэ адно даволi распаўсюджанае парушэнне — адсутнасць звестак аб адказным за вядзенне кнiгi альбо правiльна аформленых рэквiзiтаў суб’екта гаспадарання.

Наколькi ж часта Кнiга заў-ваг i прапаноў выкарыстоўваецца як iнструмент рэгулявання канфлiктных сiтуацый? Карэспандэнт «Звязды» правёў экспрэс-апытанне наведвальнiкаў буйнейшага ў Гродне гандлёвага цэнтра «Карона». Аказалася, што з 15 чалавек нiводны апошнiм часам гэту кнiгу не патрабаваў па той прычыне, што не было патрэбы. I толькi адна жанчына прыгадала, што калiсьцi даўно, яшчэ за савецкiм часам, яна моцна пакрыўдзiлася i «накатала» скаргу на прадаўшчыцу, якая гандлявала дэфiцытам «налева». (Нават ужо не верыцца, што былi i такiя праблемы.)

Цяпер жа, бадай, найлепшым «выхавальнiкам» для работнiкаў гандлю i сферы паслуг, прынамсi ў буйных гарадах, з’яўляецца канкурэнцыя. Мяркуйце самi. У «Кароне» — некалькi соцень павiльёнаў, прычым шмат дзе гандлююць аднатыпным таварам. Такое ўражанне, што ў будныя днi прадаўцоў нават больш, чым пакупнiкоў. Дык навошта псаваць сабе нервовую сiстэму ў выпадку грубасцi альбо нейкага iншага непаразумення з прадаўцом, калi ў суседняй гандлёвай кропцы цябе чакае яго канкурэнт?

Такiя рэалii, здаецца, ужо добра засвоены амаль усiмi працаўнiкамi гандлю. Магу засведчыць гэта на ўласным вопыце клiента таго ж цэнтра «Карона»: за два гады нiводнай падставы для скаргi ў мяне не ўзнiкала, наадварот, можна было пакiнуць пiсьмовую падзяку за добразычлiвасць i дапамогу ў выбары тавару. Але ж гэта не нейкi цуд, не прыемнае выключэнне з правiлаў, а ўжо норма, належнае выкананне сваiх прафесiйных абавязкаў. Ды i цi чакаюць ад цябе нейкага «аўтографа»? Справа ў тым, што кнiгi заўваг i прапаноў давялося ўбачыць на прыкметным месцы толькi ў лiчаных павiльёнах, у асноўным жа яны, мабыць, не афiшыруюцца альбо знаходзяцца не ў наёмнага персаналу, а ў гаспадароў гандлёвых кропак. Хоць, паўтаруся, у цэлым «мiкраклiмат» тут нармальны.

Зрэшты, «расслабляцца» пакупнiку не варта, бо ветлiвыя ўзаемаадносiны памiж суб’ектамi гандлёвай здзелкi — гэта яшчэ не гарантыя яе паспяховасцi. Пакупнiк павiнен добра ведаць свае правы, а для гэтага ля iнфармацыйнага цэнтра «Кароны» можна азнаёмiцца i з Законам «Аб абароне правоў спажыўцоў», iншымi рэгулюючымi дакументамi, i з нумарамi тэлефонаў уладных i iншых структур, куды можна звярнуцца ў выпадку канфлiктнай сiтуацыi. Але нешта не бачна там зацiкаўленых «вучняў».

На жаль, многiя з нас не хочуць вучыцца на чужых памылках. Здавалася б, элементарнае правiла — узяць у прадаўца дакумент, якi пацвярджае факт куплi тавару. Гэта нескладана, прадавец не мае права адмовiць. Не, трэба сабе ж стварыць дадатковыя праблемы на той выпадак, калi рэч раптам акажацца з дэфектам...