«Перарэгiстраваць чэкi змагу, калi «паднясуць» да вакенца»

Источник материала:

У пасёлку знаходзiцца фiлiял Жлобiнскага аддзялення «Беларусбанка», дзе ў 1994 годзе я атрымаў чэкi «Жыллё». Прыватызаваць кватэру па прычыне хваробы я не змог, таму яны засталiся нявыкарыстанымi. Па пытанню iх перарэгiстрацыi я звяртаўся ў мясцовы фiлiял, дзе i атрымлiваў чэкi, але мне адказалi, што трэба ехаць у Жлобiн, прычым толькi асабiста. Наняць транспарт i людзей, якiя б суправаджалi мяне i падвялi (дакладней «паднеслi») да запаветнага вакенца, мая пенсiя не дазволiць, ды i на такую «рэкламу» я не дазволю сабе пайсцi. Спроба знайсцi ў пасёлку вольнага чалавека, каб заняўся маёй справай па даверанасцi (хоць гэта i стратна), нам не ўдалося. Можа, ёсць iншыя варыянты?

Iван Васiльевiч Мiранчукоў, п. Лукскi Жлобiнскага раёна.

— Сiтуацыя сапраўды нестандартная, прынамсi, мы з ёй сутыкаемся ўпершыню, — паведамiла нам галоўны спецыялiст упраўлення жыллёва-камунальнай гаспадаркi Жлобiнскага райвыканкама Жанна Семянец, да якой мы звярнулiся ў пошуках адказу на пытанне чытача. — Патэлефануйце пазней, паспрабуем навесцi даведкi, якiм чынам можна дапамагчы вашаму заяўнiку.

Праз нейкi час Жанна Бранiславаўна паведамiла наступнае. Яна звязалася са старшынёй мясцовага сельскага Савета (паводле слоў апошняга, наш чытач туды па дапамогу не звяртаўся), якi прапанаваў дапамагчы аформiць даверанасць на чалавека, якi возьме на сябе клопат па справе чытача. Канешне, гэта будзе каштаваць нейкую суму. У сельскага Савета ёсць транспарт, таму можна паспрабаваць дамовiцца i наконт яго, выказала меркаванне Жанна Семянец. Магчыма, жыхару пасёлка гэта паслуга ўвогуле нiчога не будзе каштаваць.

Разам з тым, дадала яна, у заяўнiка ёсць працаздольны сын, якi пражывае ў Гомелi. Ён мог бы дапамагчы бацькам вырашыць iх праблему (гэта можна зрабiць нават у выхадны дзень — у суботу). Тым больш што з лiста незразумела, на каго яны збiраюцца афармляць перарэгiстраваныя чэкi.