Пытанне з нагоды

Источник материала:

Так, напрыклад, дачку вядомай актрысы Гвiнет Пэлтроў завуць Apple (Яблык). Моднымi таксама з’яўляюцца такiя iмёны, як Sunshine (Сонечны свет), Tiger (Тыгр), Fire-Lily (Вогненная лiлiя), Bambi (Бэмбi).

Яшчэ не так даўно ў нас таксама было модна назваць сваё дзiця, напрыклад, Акцябрынай цi Ротарам...

ЯК ВЫ ЛIЧЫЦЕ, ЦI МАЕ СЭНС ПРЫТРЫМЛIВАЦЦА МОДЫ НА ДЗIЦЯЧЫЯ IМЁНЫ?

Наталля ТАМЕЛА, беларуская спявачка:

— Мне найбольш блiзкiя i зразумелыя звычайныя iмёны класiчнага ўзору. Я маю на ўвазе славянскiя iмёны. Таму я нiколi б не назвала сваю дачку Apple.

Ганна ГЛАЗКОВА, сярэбраны прызёр Алiмпiйскiх гульняў, чэмпiёнка свету i Еўропы па мастацкай гiмнастыцы:

— Apple па-англiйску гучыць прыгожа, калi не перакладаць... На мой погляд, iмя павiнна мець нейкi сэнс i ўплываць на характар. Напрыклад, у жаночым iменi Вiкторыя ёсць сiла, якая, я лiчу, дапамагае ў жыццi. I яшчэ мне падабаецца традыцыя, калi дзяцей называюць у гонар бацькоў.

Iрына ЯКАЎЛЕВА, вядучая праграмы Першага нацыянальнага тэлеканала «Панарама ў суботу»:

— У мяне ёсць дачка Маша, якой ужо чатыры з паловай гады. Я выбiрала iмя вельмi доўга, дзевяць месяцаў. Кожны дзень я шукала новыя iмёны ў розных часопiсах, бо мне хацелася чагосьцi моднага, яркага. Аднак новыя iмёны мне падабалiся толькi адзiн дзень, i не болей. У рэшце рэшт я вырашыла спынiцца на iменi маёй любiмай бабулi i назваць дачку ў яе гонар.

Вольга ГАПЕЕВА, беларускi лiтаратар, перакладчык:

— Я даволi спакойна стаўлюся да нейкiх модных тэндэнцый, што датычацца iмёнаў. Калi людзям здаецца, што iхняму дзiцяцi будзе ўтульна жыць з тым цi iншым iмём, гэта iх права называць яго цi яе Яблыкам цi Манiторам. I хоць у мяне няма сваiх дзяцей, мне даводзiцца шукаць iмёны для сваiх персанажаў, што, мушу сказаць, не самае простае. Неяк я знайшла ў бабулi «Слоўнiк асабовых уласных iмёнаў» 1965 года выдання. Чытаць яго было весела, i я падумала: «Калi можна называць чалавека Трактарынай цi Галакцiёнам, чаму б не прыдумаць што-небудзь кшталту Шампунь Iванавiч цi Дошка Сямёнаўна?». Карацей, вычварацца можна бясконца. А калi сур’ёзна, сваю дачку цi сына я назвала б беларускiм iмем цi прыдумала б якое-небудзь новае iмя — паэтычнае i прыгожае па гучаннi.

Рубрыку вядзе Вiкторыя ШМЯЛЁВА.