Кадры i фiнансы вырашаюць усё

Источник материала:

— Мы сабралiся тут не для таго, каб паслухаць чыёсьцi выступленне i раз’ехацца па дамах. Я хацеў бы, каб тут, у гэтай зале, адбыўся шчыры, адкрыты дыялог, каб былi ўзняты i абмеркаваны тэмы, якiя хвалююць i нас, i вас, — падкрэслiў Генадзь Навiцкi, звяртаючыся да прысутных.

Жыццё, як вядома, не стаiць на месцы. I задача дэпутатаў усiх узроўняў — такiя змяненнi адсочваць i своечасова адлюстроўваць у законах. Аднак спяшацца ў гэтай справе не варта — сёння дастаткова ўдасканальваць тую заканадаўчую базу, якая ёсць, сказаў Старшыня Савета Рэспублiкi.

Але працаваць над выяўленнем слабых бакоў заканадаўства, выцягваць «з глыбiнь» праблемы трэба не ў кабiнетах, а апусцiўшыся на зямлю. Менавiта адтуль лепш бачна, як працуе тая цi iншая форма закона, дэкрэта цi ўказа. Неабходна дайсцi да людзей i зразумець, чаму ўзнiклi тыя цi iншыя прабелы i пытаннi, данесцi iх да вышэйшых «эшалонаў» улады i стварыць, нарэшце, механiзм узаемадзеяння, якi працаваў бы на апярэджанне гэтых праблем.

Генадзь Навiцкi падкрэслiў, што неабходна тэрмiнова вызначыць i дакладна акрэслiць функцыi саветаў дэпутатаў на месцах, а таксама забяспечыць гэтыя функцыi фiнансава — каб органы мясцовага кiравання i самакiравання маглi самастойна вырашаць шматлiкiя пытаннi жыццядзейнасцi чалавека. А для гэтага «нарматворчая дзейнасць мясцовых саветаў павiнна быць удасканалена ў самы блiжэйшы час».

Найбольшае ажыўленне i бурную рэакцыю ў зале выклiкала пытанне, звязанае з магчымым пераводам пярвiчнага звяна ўлады (сельскiх i пасялковых саветаў дэпутатаў) на ўзровень адмiнiстрацыi населеных пунктаў. Пераважная большасць прысутных выказалася супраць такой прапановы — на iх погляд, паспешлiвай i не да канца прадуманай. Як падкрэслiлi ўдзельнiкi сустрэчы, сённяшняя форма ўлады, калi старшыня сельсавета з’яўляецца прадстаўнiком i заканадаўчай, i выканаўчай улады адначасова, адпавядае патрабаванням рэчаiснасцi. У пярвiчнага звяна ўлады павiнен быць статус менавiта сельсавета, а не адмiнiстрацыi. «У процiлеглым выпадку мы адштурхнём простых людзей ад удзелу ў кiраваннi дзяржавай i тым самым зацiснем само паняцце, сам сэнс самакiравання. Такi iнстытут, як сельсавет, разбураць нельга», — менавiта так выказвалiся многiя ўдзельнiкi сустрэчы.

Прысутныя прыйшлi да высновы, што сёння як нiколi нiзавое звяно ўлады мае патрэбу ў падтрымцы. Для таго, каб сельсаветы маглi дастойна спраўляцца з ускладзенымi на iх функцыямi, iх трэба ўмацаваць па трох асноўных пазiцыях: кадры, фiнансы i матэрыяльная база. «Мы ўдзячныя, што на нашы праблемы нарэшце пачалi звяртаць увагу ў вышэйшых структурах улады, бо да нядаўняга часу сельсаветы варылiся ва ўласным саку. Многае на месцах залежыць ад нас, але ж i нам патрэбна дапамога», — выказалiся старшынi раённых i гарадскiх саветаў дэпутатаў падчас сустрэчы.