З Новым годам, з новай парай!

Источник материала:

Жыхары горада выказваюць падзяку асабiста кiраўнiку дзяржавы, якi падтрымаў iнiцыятыву будаўнiцтва, i губернатару Мiншчыны Мiкалаю Дамашкевiчу — за дапамогу. У першы дзень работы лазнi наведвальнiкаў прыйшло так шмат, што ў гардэробе не хапiла месцаў. Паводле слоў старшынi Слуцкага райвыканкама Аляксандра Драко, на лазню зрасходавана больш за 4 мiльярды рублёў. Прыгожае сучаснае памяшканне выглядае сапраўды па-еўрапейску. У гэтым карэспандэнт «Звязды» пераканаўся асабiста.

— Акрамя жаночай i дзвюх мужчынскiх залаў у лазнi ёсць руская парылка i фiнская саўна для невялiкiх кампанiй аматараў лёгкай пары, масажныя кабiнеты, душавыя кабiны, памяшканнi для прыняцця ванны, абсталяванне для сушкi валасоў, — расказаў Аляксандр Драко. — Акрамя таго, з’явiлiся дзве кабiны для iнвалiдаў. У далейшым мы плануем пабудаваць басейн, бiльярдную залу. Пасля лазнi можна будзе выйсцi на вулiцу i нырнуць у гурбу снегу — зараз мы агароджваем для гэтай мэты тэрыторыю.

I сапраўды, аматары лазнi падкрэслiваюць, што ў Слуцку заўсёды была выдатная пара. Як расказалi па сакрэту супрацоўнiкi новай лазнi, у парыльных памяшканнях замест цэнтральнага ацяплення выкарыстоўваюцца дровы — згодна з усiмi правiламi. Таму i прыязджаюць у Слуцк папарыцца i з блiжэйшых раёнаў, i нават са сталiцы.

З’яўленне новай лазнi — яшчэ адно сведчанне таму, што будаўнiцтва ў горадзе сацыяльных аб’ектаў працягваецца. Кошт квiткоў для наведвальнiкаў нязначны — каля двух-трох тысяч рублёў.

Такiм чынам, пасля заканчэння святкавання рэспублiканскiх «Дажынак» Слуцк не збiраецца збаўляць тэмпы.

— Праца над далейшым упрыгажэннем горада працягваецца. Засталося яшчэ шмат аб’ектаў, якiя патрабуюць добраўпарадкавання, — адзначае Аляксандр Драко. — Асаблiва трэба звярнуць увагу на асфальтаванне двароў i тратуараў, узвядзеннем двухсхiльных дахаў дамоў. У будучым годзе сродкамi дапаможа абласны бюджэт, але трэба разлiчваць на ўласныя магчымасцi. Горад плануе выдзелiць у 2006 годзе на рамонт аб’ектаў каля 10 мiльярдаў рублёў.