Памiж Мiнскам i... Канамi

Источник материала:

Запрашальнiк

...Канскi фестываль — бадай, самы прэстыжны i значны з усiх. Дастаткова заўважыць, што па колькасцi акрэдытаванай прэсы ён займае другое месца пасля Алiмпiйскiх гульняў, а па гучнасцi iмёнаў мэтраў рэжысуры, ад Ларса фон Трыера да Квенцiна Таранцiна, проста не мае роўных. Ад Беларусi на сусветным кiнафоруме з году ў год прысутнiчае толькi радыё «Юнiстар», i менавiта дзякуючы яму з 2002 года беларусы не толькi слухаюць эксклюзiўныя рэпартажы, але i могуць паглядзець выбiтныя кiнафiльмы. Цяперашнi праект — чацвёрты ў скарбонцы сумесных акцый радыёстанцыi i УП «Кiнавiдэапракат».

«Нам здаецца, што кiно, якое мае асаблiвую вагу i асаблiвую каштоўнасць, патрабуе i асаблiвага стаўлення да сябе», — растлумачыў праграмны дырэктар радыё «Юнiстар» Iгар Сукманаў, як ён бачыць развiццё праекту. Паводле задумкi, раз на два месяцы на працягу тыдня ў сталiчным Доме кiно будуць праходзiць эксклюзiўныя паказы карцiн, заяўленых у праграме Канскага фестывалю. Прычым у спiс трапiць не толькi артхаус, так званае мудрагелiстае «кiно для яйкагаловых», але абсалютна розныя фiльмы, якiя здольны прынесцi задавальненне гледачам. Прычым паказвацца гэтыя карцiны будуць без субцiтраў, на мове арыгiнала — з сiнхронным перакладам (балазе, апаратура Дома кiно гэта дазваляе). Што датычыцца кошту бiлетаў на сеансы «Канаманii», то, як запэўнiў галоўны рэжысёр Дома кiно Аляксандр Богдан, ён не перавысiць звычайнага тутэйшага прэйскуранта (5 тысяч беларускiх рублёў — бiлет на аднасерыйны фiльм, 7 тысяч — на дзвюхсерыйны).

«Канаманiя» рабiла пробны паказ яшчэ ў студзенi, аднак афiцыйна праект адкрыецца 7 красавiка фiльмам Вудзi Алена «Матч Пойнт» (адзiн з фаварытаў леташняга 59-га Канскага фестывалю, удзельнiчаў у пазаконкурсным паказе). Гэта карцiна, дарэчы, стартавала ў Расii 1 студзеня 2006 года, на дзень раней за «Дзённы дазор» — i тры месяцы iшла пры аншлагах, так што ў маскоўскiх кiнапракатчыкаў з вялiкай цяжкасцю ўдалося «вырваць» копiю (iх у свеце ўсяго 5). Таксама ў гэтым годзе ў рамках эксклюзiўнага пракату ў Мiнску будуць паказаны фiльмы Педра Альмадовара, Дэвiда Лiнча, Дамiнiка Мола, Дарэна Аранофскi, Акi Каўрысмякi.

Тым часам сталiчны кiнапракат не збiраецца спыняцца на дасягнутым i, акрамя «Канаманii» i ўжо ўлюбёнага праекта «Кiнафармат 4х4», распрацоўвае яшчэ два спецыяльныя праекты. Так што глядзець нам — не перагледзець. Шкада, што пакуль гэта датычыцца толькi мiнчан...