Чаму вы чытаеце «Звязду»?

Источник материала:

Пытанне да чытача

— Па абавязку службы мне даводзiцца штодзень праглядаць шмат газет. Сярод цэнтральных выданняў я не ў апошнюю чаргу заўсёды вылучаю i «Звязду». Лiчу газету цiкавай. Па-першае, мяне задавальняе яе перыядычнасць — пяць разоў на тыдзень, па-другое, беларуская мова, на якой яна выдаецца, па-трэцяе, шматлiкiя бясплатныя дадаткi, у якiх можна знайсцi шмат цiкавага на любы густ.

Асабiста я чытаю ў «Звяздзе» практычна ўсё — ад навiнаў палiтыкi да культуры. З асаблiвай цiкавасцю адсочваю любую iнфармацыю аб рабоце пошты, найперш калi гаворка iдзе аб нейкiх новых, нетрадыцыйных формах паслуг, што прапануюць нашы калегi ў iншых рэгiёнах. Атрымлiваецца такое своеасаблiвае перайманне вопыту. Уважлiва чытаю ўсе спартыўныя навiны, паколькi раней на працягу пяцi гадоў сур’ёзна займалася ў Мiнску шэйпiнгам.

Што б хацела параiць газеце надалей, дык гэта разгледзець магчымасць друкавання тэлепраграмы ўсiх каналаў па канкрэтных рэгiёнах. Скажам, у нашым выпадку — па Мiнскай вобласцi, каб мясцовы жыхар, дачнiк маглi без праблем азнаёмiцца з тымi тэлеканаламi, якiя прымаюцца ў нашай мясцовасцi.