Намечана закрыць бальнiцу. Цi ўсё ўзважылi?

Источник материала:

ФОРС-МАЖОР

Пачалася гэта гiсторыя з таго, што Беларуская чыгунка, на балансе якой знаходзiлася бальнiца, адмовiлася ўтрымлiваць лячэбныя ўстановы па ўсёй краiне i перадала iх Мiнiстэрству аховы здароўя. Цяпер бальнiцы чыгункi пераходзяць у камунальную ўласнасць гарадоў. Быццам бы прывычная рэарганiзацыя. Ды толькi Оршу спасцiгла асаблiвая доля.

Рэспублiканскiмi камiсiямi будынкi бальнiцы прызнаны зношанымi (на 80 працэнтаў). Таму i прынята рашэнне аб немэтазгоднасцi эксплуатацыi iх у далейшым. Праўда, асноўную прычыну закрыцця бальнiцы Мiнiстэрства аховы здароўя сфармулявала так: аптымiзаваць расходы на ўтрыманне бальнiц у Оршы. Трэба разумець, новамоднае слова мае мэтай скарачэнне расходаў. Таму лячэбную ўстанову закрываюць, а пакiдаюць толькi палiклiнiку.

У сувязi з гэтым 300 чалавекам сярэдняга медперсаналу нялёгка будзе знайсцi работу, бо ў горадзе ёсць сваё медвучылiшча, таму тут заўсёды ўзнікаюць праблемы з працаўладкаваннем гэтай катэгорыi работнiкаў.

За апошнiя тыднi медперсанал бальнiцы i жыхары чыгуначнага раёна спiсалi вялiкi стос паперы на звароты i просьбы ў вышэйшыя ўладныя структуры, каб бальнiцу ў Оршы пакiнулi. Актывiзавалiся дэпутацкi корпус горада i прафкамы на прадпрыемствах чыгуначнага вузла.

У зваротах прыводзяцца такiя доказы.

Бальнiцы ў цэнтры горада i на льнокамбiнаце не змогуць прыняць паток хворых з былой чыгуначнай, дзе абслугоўвалi 25 тысяч чалавек. Бо нават цяпер амаль усе iх аддзяленнi загружаны празмерна, пацыенты ляжаць на калiдорах. Да таго ж, там горшыя ўмовы ўтрымання пацыентаў i горшае забеспячэнне сучасным абсталяваннем (чыгуначная бальнiца лiчылася лепшай у горадзе на працягу дзесяцiгоддзяў). Цi мэтазгодна (гуманна?!) эканомiць на медыцынскiм абслугоўваннi ў Оршы, дзе матэрыяльная база лячэбных устаноў была значна слабейшая, чым у iншых гарадах такога тыпу, ды яшчэ горад i раён вызначаюцца высокiм узроўнем дзiцячай смяротнасцi i анкалагiчных захворванняў? Такое ўражанне, што чыноўнiкi «зацыклiлiся» на эканомii сродкаў (аптымiзацыi) па заходняму варыянту i забылiся, што жывуць не на Захадзе, а ў краiне з высокiм ўзроўнем захворванняў. I ў блiжэйшы час, вiдаць, не трэба чакаць скарачэння колькасцi хворых.

Падставу — высокi працэнт зношанасцi будынкаў бальнiцы — i медперсанал, i жыхары раёна лiчаць надуманай. На iх думку, карпусы прастаяць яшчэ дзесяткi гадоў. Яны дагледжаныя, тэрыторыя добраўпарадкавана, вакол карпусоў — прыгожая паркавая зона.

Усе гэтыя доказы былi прыведзены на сходзе калектыву ў прысутнасцi начальнiка ўпраўлення аховы здароўя Вiцебскага аблвыканкама Валерыя Хаджаева. Ён упэўнiваў прысутных, што загад аб лiквiдацыi бальнiцы яшчэ не падпiсаны. Таму ёсць шанц, што яе не закрыюць. У Оршы паверылi сказанаму i чакаюць станоўчага адказу.