Сэнс жыцця — у дзецях

Источник материала:

Самай маладой мацi, якая прысутнiчала на свяце ў Маладзечне, толькi 28 гадоў. Ганна Лямкевiч нарадзiла 5 дзяцей. «Пакуль што на свет з’явiлiся адны хлопцы. Але муж i я жадаем яшчэ i дзяўчынку, лепш — дзве», — з радасцю расказала Ганна. — Таму, я ўпэўнена, наша сям’я стане большай». Як расказала мне Ганна Лямковiч, у кожнай жанчыны на першым месцы стаiць асабiстае шчасце, а потым ужо — адукацыя, прэстыжная работа, прыбытак. Для Ганны асабiстае шчасце — гэта дзецi i муж. Сямейная пара жыве ў вёсцы Гародзькi Валожынскага раёна. Муж жанчыны — праваслаўны святар...

«Сэнс жыцця — у дзецях», — лiчыць васьмiдзесяцiгадовая Таццяна Iосiфаўна Кошаль. У Маладзечне яна была ганаровым госцем. За сваё жыццё Таццяна Iосiфаўна нарадзiла i выхавала пяць дачок. Зараз у яе 13 унукаў i праўнук. Трэцяя яе дачка, Антанiна, стала алiмпiйскай чэмпiёнкай ХХ Алiмпiяды ў Мюнхене.

— Чаму некаторыя жанчыны не жадаюць нараджаць дзяцей? — разважала над маiм пытаннем Таццяна Iосiфаўна. — Лайдакамi сталi! Калi няма дзяцей, няма i сям’i. Дзеля чаго тады ўсе машыны-кватэры, калi дзяцей няма!? Я з мужам пражыла 57 гадоў у шчасцi i згодзе. Пасля вайны нават ложка ў нас не было — спалi два гады на падлозе. Але дзяцей хацелi заўсёды, i працавалi, працавалi, працавалi. I ўсё тады атрымлiвалася.

Першы намеснiк старшынi Мiнаблвыканкама Леанiд Крупец падзялiўся сваiмi ўражаннямi:

— Вельмi сiмвалiчна, што Дзень мацi праходзiць у адзiн дзень з рэлiгiйным святам Пакрова Багародзiцы. Iмя мацi — святое для кожнага, i Багародзiца ўвасабляе той вобраз мацi, якая выхавала кожнага з нас.

— Леанiд Фёдаравiч, у дзяржаве падрыхтавана праграма дэмаграфiчнай бяспекi. Што робiць абласны выканаўчы камiтэт у сваю чаргу па гэтаму пытанню?

— Акрэсленая дзяржаўная праграма — падмурак не толькi для дэмаграфiчнай, але i для эканамiчнай бяспекi Беларусi. Абласны выканаўчы камiтэт, як дзяржаўны орган, у сваю чаргу праводзiць работу для таго, каб узняць прэстыж i чалавека, i дзiцяцi, i мацi. Умовы працы паляпшаюцца, заработная плата становiцца большай. У той жа час людзi гiнуць ад вытворчага траўматызму, у аварыях на дарогах. Здароўе чалавека падрываюць шкодныя звычкi — алкагалiзм, а ў апошнiя гады i наркаманiя. Вырашэнне гэтых праблем павiнна падштурхнуць развiццё грамадства, узняць нараджальнасць. Мы шмат увагi надаём развiццю спорту, заахвочваем да здаровага ладу жыцця. Здаровы чалавек можа стварыць моцную, вялiкую сям’ю, нарадзiць не аднаго-двух, а, можа, i пяць дзяцей. Таму зараз мы падтрымлiваем шматдзетныя сем’i i дапамагаем iм.

Дзмiтрый АЛЬФЕР.