«Кiнуў» на 15 мільёнаў

Источник материала:

Чарговай ахвярай махляра стала жанчына, у якой ён «выцыганiў» 15 мiльёнаў рублёў на аўтамабiльным рынку «Малiнаўка». У адносiнах да «свавольнiка» Глыбоцкiм мiжрайаддзелам Упраўлення Дэпартамента фiнансавых расследаванняў па Вiцебскай вобласцi ўзбуджана крымiнальная справа.

Iгар ГРЫШЫН.

ЗНIКЛI КРЫЖЫКI, ПЯРСЦЁНКІ, ЛАНЦУЖКI

З дома старасты праваслаўнага храма Святой Алены ў пасёлку Кiраўскi Вiцебскага раёна скралi 60 крыжыкаў, 50 пярсцёнкаў i 45 ланцужкоў — усё са срэбра, коштам 1,5 мiльёна рублёў. Жанчына звярнулася па дапамогу ў РАУС i адзначыла, што крадзеж мог адбыцца днём. Невядомы трапiў у закрыты дом, узламаўшы дзвярныя замкi. Вядзецца следства.

Аляксандр ПУКШАНСКI.

НА МУШКУ ТРАПIЛI АЛЕНI

У Белавежскай пушчы, каля вёскi Панасюкi, браканьеры застрэлiлi пару аленяў (самца i самку). Мяса забралi, а скуры кiнулi. Знойдзены 4 гiльзы калiбру 7,62 мм. А страты дзяржаве нанесены больш за 17 млн рублёў. Злачынцаў шукаюць.

Сымон СВIСТУНОВIЧ.

ЖУРАВIНЫ СКРАЛI!

З дому пенсiянеркi 1938 года нараджэння ў Лепельскiм раёне скралi 10 кiлаграмаў журавiн. Калi яе сын — iндывiдуальны прадпрымальнiк звярнуўся па дапамогу ў мiлiцыю, злодзея адшукалi хутка. Iм аказаўся 32-гадовы непрацуючы мясцовы жыхар, якi раней быў асуджаны за махлярства. Скрадзеныя ягады ацанiлi ў 20 тысяч рублёў.

Аляксандр ПУКШАНСКI.

«ЛIПАВЫЯ» БАЛЬНIЧНЫЯ

з’явiлiся ў Мазыры. Выраблены яны з дапамогай сучаснай тэхнiкi i вельмi падобныя на сапраўдныя. Ужо зафiксавана некалькi выпадкаў прадастаўлення iх у некаторыя арганiзацыi горада. Адным словам, мiлiцыi ёсць работа.

Уладзiмiр ПЕРНIКАЎ.