Сяргей Сiдорскi: «Нарматыўна-прававую базу ў сферы будаўнiцтва неабходна ўдасканалiць»

Источник материала:

Як адзначыў Сяргей Сiдорскi на пасяджэннi Савета Мiнiстраў, «трэба стварыць празрыстыя, зразумелыя правiлы для ўсiх, скарацiць бюракратычную валакiту».

Ён таксама запатрабаваў да канца года вырашыць пытаннi з увядзеннем у эксплуатацыю жылля для шматдзетных сем’яў. Цяпер доля фактычнага аб’ёму ўводу такога жылля ў эксплуатацыю складае 33,1 працэнта ад гадавога задання. Для такiх сем’яў у студзенi—вераснi гэтага года пабудавана 1442 жылыя памяшканнi.

Сяргей Сiдорскi звярнуў увагу на тое, што ў рэспублiцы не выконваюцца паказчыкi па структуры жылля, якое будуецца. Нагадаем, планавалася, што ў 2006 годзе доля будаўнiцтва жылля для грамадзян, якiя маюць патрэбу ў паляпшэннi жыллёвых умоў, будзе складаць не менш як 60 працэнтаў ад агульнага аб’ёму. Сёння гэты паказчык знаходзiцца на ўзроўнi 50 працэнтаў.

Прэм’ер-мiнiстр Беларусi запатрабаваў ад мясцовых органаў улады актывiзаваць да канца года работу па добраўпарадкаванню аграгарадкоў. У цэлым, як паведамiў у сваiм дакладзе намеснiк прэм’ер-мiнiстра Вiктар Бура, у Беларусi ў студзенi—вераснi 2006 года ўведзена ў эксплуатацыю 3,136 млн кв.м жылля, што на 10 працэнтаў больш, чым за аналагiчны перыяд мiнулага года. Гэта складае 74,7 працэнта ад гадавога плана. Пры гэтым у Мiнску заданне на дзевяць месяцаў выканана толькi на 79,3 працэнта. Паводле слоў мэра сталiцы Мiхаiла Паўлава, па аб’ектыўных прычынах у Мiнску ў гэтым годзе будзе пабудавана каля 930 тыс. кв.м жылля пры плане 1070 тыс. кв.м.