Пiва... з ртуццю

Источник материала:

I такое бывае

Як паведамiлi карэспандэнту нашай газеты ў цэнтры прапаганды i навучання пры ўстанове Гомельскага абласнога ўпраўлення МНС, пiва з «сюрпрызам» вясковец набыў у магазiне. Змесцiва паўталiтровай бутэлькi «Дняпроўскага» Рэчыцкага пiўзавода, з якой вярнуўся дадому пакупнiк, на смак, быццам бы, аказалася звычайным напоем, ды толькi на дне пластмасавай ёмiстасцi знаходзiўся небяспечны метал. Пацярпелы ўбачыў гэта вельмi позна, калi праглынуў разам з пiвам частку ртуцi. Супрацоўнiкi хiмiчнай разведкi, якiх на месца здарэння разам з медыкамi ён выклiкаў, канфiскавалi каля 10 грамаў ртуцi, што яшчэ знаходзiлася ў бутэльцы (дарэчы, у звычайным тэрмометры, якiм вымяраецца тэмпература цела, утрымлiваецца каля 1,5—2 грамаў гэтага металу). Што датычыцца пацярпелага, то ён быў дастаўлены ў бальнiцу з галаўным болем. Як паказала флюараграфiя, у мужчыны, сапраўды, у страўнiку была ртуць. Урачы зараз ацэньваюць стан хворага як здавальняючы. А вось праверкай вышэйзгаданага здарэння зараз займаюцца супрацоўнiкi кампетэнтных службаў: яны i павiнны высветлiць, якiм чынам небяспечны метал трапiў у пiва...