Уладзiмiр Панцюхоў: «Праца над памылкамi ўдалася»

Источник материала:

УЛАДА Ў АСОБАХ

— Той вiзiт кiраўнiка дзяржавы на Шклоўшчыну стаў вялiкiм штуршком да плённай працы. Мы ўбачылi, што ўсе структуры — спажывецкая кааперацыя, сфера культуры, ахова здароўя, сельскiя Саветы — працуюць i iмкнуцца вырашаць свае праблемы паасобку. Атрымлiвалася, як у Крылова: лебедзь, рак i шчупак цягнуць у розныя бакi. I ўпершыню пратакол даручэнняў Прэзiдэнта i мерапрыемствы аблвыканкама ўвязалi ўсе структуры ў адну агульную «карцiнку», у якой знайшлося месца i для органаў мясцовага самакiравання. Цяпер у Магiлёўскай вобласцi мы iмкнёмся ў сельскай мясцовасцi размяшчаць побач усе службы. Такая мадэль, каб у адным будынку быў сельскi Савет, пошта, пакой бытавога абслугоўвання, кабiнет участковага i крама. Прасцей дабiвацца вынiку, калi ўсе знаходзяцца разам.

— Калi гаварыць агулам, цi ўдалося Магiлёўскай вобласцi, мясцовым Саветам дэпутатаў, сельвыканкамам на месцах паспяхова пераадолець памылкi?

— Многiя змянiлi падыход да працы, нават светапогляд. I гэта зразумела, бо паварот дзяржавы да чалавека датычыцца ўсiх чыноўнiкаў.

— На парадку дня паўстала распрацоўка палажэння аб старшынi сельвыканкама. Наколькi гэты нарматыўны акт дапаможа ў працы на месцах?

— Адназначна дапаможа. Праўда, палажэнне яшчэ не прынята, праца iдзе. У мяне ёсць 11 рэдакцый гэтага дакумента, i ў кожную мы ўносiлi свае прапановы. У палажэннi аб старшынi сельвыканкама будуць прапiсаны ўсе дэталi працы i адзiн дзяржаўны ўзровень патрабавальнасцi. Для каардынацыi органаў мясцовага самакiравання будзе створаны рэспублiканскi савет, у якiм возьмуць удзел прадстаўнiкi ўсiх узроўняў: ад дэпутатаў сельскiх Саветаў да парламентарыяў. Яны будуць вывучаць iнфармацыю з месцаў i падаваць кiраўнiцтву краiны прапановы розных напрамкаў. Напрыклад, пра матэрыяльна-тэхнiчнае забеспячэнне сельскiх Саветаў.

— Гэта актуальнае пытанне. Каб добра працаваць, патрэбны падмурак — матэрыяльная база. Цi ўдалося сёлета забяспечыць тэхнiкай i транспартам сельскiя Саветы?

— Год таму мы расказалi, што ў многiх Саветах з усёй тэхнiкi ёсць толькi машына для друкавання «Ятрань». Гэта не проста ўчарашнi, а пазаўчарашнi дзень. I толькi прыкладна ў пятай частцы сельскiх Саветаў былi камп’ютары. I як працаваць? Што ў такой сiтуацыi рабiць з сацыяльнымi стандартамi, «адным акном»? А дырэктыва № 2 цяпер патрабуе лiквiдаваць чэргi i бюракратычныя замарочкi.

Мы здолелi за гэты год шмат чаго зрабiць. Усе старшынi Саветаў, дзе ёсць зона пакрыцця, атрымалi мабiльныя тэлефоны. I ва ўсiх сельскiх Саветах з’явiлiся тэлевiзары. Таксама зрабiлi сур’ёзныя крокi на шляху абнаўлення аўтатранспарту. I цяпер па вынiках 2006 года ў кожны сельскi раён набылi па новаму аўтамабiлю: iх, як заахвочванне, атрымаюць тыя Саветы, якiя лепей спрацавалi. У мiнулым месяцы быў праведзены тэндар, ужо аплачана камп’ютарная тэхнiка для кожнага сельскага Савета ў вобласцi. Усе атрымаюць новыя камп’ютары.

— Увесь мiнулы год у «Местном самоуправлении» кiраўнiкi мясцовых Саветаў дэпутатаў расказвалi, што для нармальнай працы iм патрэбны таксама дадатковыя штатныя адзiнкi i большы бюджэт. Што з такiх прапаноў ажыццёвiцца ў 2007 годзе?

— Паводле прынятых бюджэтаў, кожны сельвыканкам атрымае пэўную суму грошай адпаведна з пададзенымi раней сваiмi падлiкамi таго, колькi патрэбна на добраўпарадкаванне, рамонт будынкаў i гэтак далей. Сродкаў будзе выдаткавана ў некалькi разоў больш, чым летась.

Што датычыцца штатнага раскладу, то апетыты былi вялiкiя — аж да 7 супрацоўнiкаў, але не трэба забывацца пра лiнiю кiраўнiка дзяржавы на скарачэнне апарату. Мяркую, што ў кожным сельскiм Савеце павiнна працаваць як мiнiмум тры чалавекi: старшыня, сакратар i тэхнiчны супрацоўнiк. А далей — па сiтуацыi, хоць заробак супрацоўнiкаў Савета будзе знаходзiцца ў прамой залежнасцi ад iх колькасцi, а прэмiя — ад вынiкаў працы.

— Людзi, якiя жывуць у вёсках, аддаленых ад цэнтраў сельскiх гаспадарак, маюць вострую патрэбу ў дапамозе ў апрацоўцы зямельных участкаў, нарыхтоўцы дроў i гэтак далей, i яны гатовыя плацiць за паслугi. Так, у Клiмавiцкiм раёне стварылi прадпрыемства «Сяляне», якое займаецца гэтай справай. Цi запатрабаваны гэты вопыт у вобласцi?

— Гасразлiковае механiзаванае звяно павiнна дапамагчы людзям пасеяць i ўбраць, прывезцi дровы, падрэзаць аварыйныя дрэвы, зрабiць агароджу i вырашыць многiя iншыя праблемы вяскоўцаў. У розных месцах у пералiку такiх паслуг ужо значыцца да двух дзесяткаў пунктаў.

Актыўна механiзаванымi звеннямi займаюцца ў Клiмавiцкiм i Шклоўскiм раёнах. Мы iм дапамаглi з тэхнiкай. Улада лiчыць гэта добрай справай, але навязваць менавiта гэтую схему сельскiм раёнам не будзе. Гэта сфера паслуг у такiм выглядзе толькi пачынае развiвацца, i будучае пакажа, якая яе форма больш зручная для людзей. Мне падаецца, што механiзаваныя звеннi ў першую чаргу будуць запатрабаваныя там, дзе вялiкая раскiданасць малых вёсак. Туды нявыгадна ехаць кааператарам i пра iх не будзе клапацiцца гаспадарка, якая спачатку глядзiць цэнтральныя сядзiбы. А гэтыя звеннi даедуць да самых далёкiх i адзiнокiх.

— Калi гутарыш з вяскоўцамi пра надзённыя праблемы, то атрымлiваецца, што кола iх iнтарэсаў традыцыйна абмяжоўваецца нарыхтоўкай палiва, прыездам аўталаўкi i медыцынскiм абслугоўваннем. Цi вызначаны для кожнага населенага пункта парадак бытавога, гандлёвага i медыцынскага абслугоўвання? Цi ўсё цяпер у парадку, прынамсi, з работай стаматалагiчнай службы ў Шклоўскiм раёне, на якую было шмат нараканняў год таму?

— Усё цяпер арганiзавана добра i талкова. Дарэчы, паводле вынiкаў 2006 года, платныя паслугi стаматалогii ў Шклоў-скiм раёне павялiчылiся ў 2,5 раза. Ды i ўвесь пералiк паслуг — бытавых, культурных, медыцынскiх i спажывецкай кааперацыi — сёння знаходзiцца на дастатковым узроўнi, i за гэта не сорамна. I не толькi ў Шклоўскiм раёне. Хоць, канешне, Шклоў-шчына — гэта наша «перадавая», там выпрабоўваецца новы вопыт. I там ёсць што паказаць людзям — напрыклад, аграгарадок Александрыю. Але такiя ёсць i яшчэ будуць будавацца i ў iншых сельскiх раёнах.

— Пасля шклоўскага вiзiту Прэзiдэнта ў вашых планах было iнспекцыйнае абследаванне вёсак, каб вывучыць грамадскае меркаванне i ацанiць якасць жыцця. Што яно дало?

— Пры абследаваннi вёсак мы рабiлi сацыялагiчнае даследаванне грамадскага меркавання. Першае было год таму, адразу пасля вiзiту, i яно выявiла i незадаволенасць працай Саветаў, i цэлыя накiрункi недапрацовак, i проста недавер людзей мясцовым органам улады: маўляў, яны тут сядзяць «для галачкi». А цяпер мы прымеркавалi новае даследаванне да выбараў у мясцовыя Саветы дэпутатаў. Хацелi даведацца, што думаюць людзi, а таксама зразумець, цi пойдуць яны галасаваць.

Можна сказаць, што сiтуацыя вакол сельвыканкамаў змянiлася, яны настроiлiся на патрэбныя для людзей справы i лагiчна, што ва ўладу пачалi верыць. I можа, няма ў нас вялiкай альтэрнатывы на выбарах 14 студзеня, але ў дэпутаты вылучалi менавiта тых, каго добра ведаюць i паважаюць людзi.

Справаздачы дэпутатаў усiх узроўняў перад народам сталi адной з форм працы. Яшчэ больш актыўна праводзяцца днi сельсаветаў. Да гэтай падзеi адказна рыхтуюцца два бакi: i госцi, якiя едуць з раёна i вобласцi, i гаспадары.

— Год таму ў сваiм каментарыi да працы над «шклоўскiмi памылкамi» вы казалi, што ёсць такiя старшынi Саветаў, якiя працуюць так даўно, што «параслi мохам». Цi адбылася змена кадраў? I, паводле прагнозаў, наколькi абновяцца кiраўнiкi мясцовых Саветаў пасля выбараў 14 студзеня?

— За мінулы год прыкладна пятая частка кадраў у органах мясцовага самакiравання змянiлася. Увогуле дэпутацкi корпус павiнен абнавiцца пасля новых выбараў больш чым напалову.

У 6—7 раёнах чакаецца абранне новых старшынь райсаветаў. Да кiраўнiкоў сельвыканкамаў прад’яўляецца цяпер нямала патрабаванняў, першае з якiх — адукаванасць. Чалавек павiнен мець вышэйшую адукацыю. I яшчэ — наяўнасць канкурэнцыi. Калi справа дойдзе да выбараў старшынь сельскiх i раённых Саветаў, акрамя асноўнай кандыдатуры, павiнны быць яшчэ дзве альтэрнатыўныя. Калi чалавек адчуе, што гэта — не яго «вотчына», а адказная праца, на якую прэтэндуюць i iншыя людзi, будзе вынiк. Больш таго, ад кандыдатаў на пасады кiраўнiкоў органаў мясцовага самакiравання мы запатрабуем скласцi своеасаблiвы творчы бiзнэс-план, якi трэба будзе абаранiць перад тымi, хто будзе вырашаць — абiраць яго на пасаду старшынi альбо не. Так што абнаўленне будзе значным, але практыка паказвае, што маладыя людзi, якiя прыйшлi ў мясцовыя Саветы, працуюць не горш за сваiх сталых i вопытных папярэднiкаў, а часам i больш самааддана.

Я памятаю, што пасля рабочай паездкi Прэзiдэнта па вобласцi, я раiў калегам зняць ружовыя акуляры, азiрнуцца i зразумець, што Саветы iснуюць для людзей, а не наадварот. Гэта па-ранейшаму актуальная парада.

— Цi ўдалося ў вынiку «працы над памылкамi» выканаць галоўную задачу — дайсцi да кожнага чалавека з яго патрэбамi?

— Не маю права сказаць, што ўсё ўдалося да канца. Але ж гэта тая праца, якая нiколi не заканчваецца. Трэба iмкнуцца да гэтай задачы пастаянна. Сельскiя Саветы блiжэй за ўсё да народа.

Таму я запрашаю ўсiх прыйсцi на выбары 14 студзеня i аддаць свае галасы за самых дастойных кандыдатаў. Трэба паверыць, што гэтыя абраннiкi зробяць новыя крокi наперад, каб у людзей стала менш праблем i каб вярнуць iм упэўненасць у заўтрашнiм днi.

Гутарыла Iлона IВАНОВА.