Стыпендыя — студэнцкае свята, альбо Спажывецкi кошык студэнта

Источник материала:

Дарэчы, у многiх краiнах не iснуе студэнцкiх стыпендый у нашым разуменнi. Напрыклад, у Германii стыпендыя выплачваецца толькi маладым людзям, прыбытак сям’i якiх знаходзiцца нiжэй пражытковага мiнiмуму. Разам з тым 50 працэнтаў сумы, якую студэнт атрымаў, плюс 9 працэнтаў гадавых давядзецца вяртаць у банк пасля заканчэння вучобы. Таму нядзiўна, што многiя адмаўляюцца ад падобнай дапамогi i лiчаць, што беларускiм студэнтам грэх скардзiцца.

А вось што думаюць наконт гэтага самi беларускiя студэнты.

Косця, БДУ, 4-ы курс:

— Грошай нiколi шмат не бывае, асаблiва ў студэнта. Але i студэнты розныя бываюць. Адны харчуюцца ў рэстаране, iншыя перабiваюцца на пярлоўцы. Таксама вялiкае значэнне мае тое, жыве студэнт з бацькамi цi не. Я мiнчанiн, таму частку стыпендыi кожны месяц адкладваю, каб на канiкулах паехаць у падарожжа, паглядзець свет. Акрамя гэтага, наведваю спартыўную секцыю, якая таксама патрабуе выдаткаў.

Дзiма, БНТУ, 3-i курс:

— Жыву я ў iнтэрнаце. Таму кожны месяц з маёй стыпендыi вылiчваюць грошы за пражыванне. Канешне, за сто тысяч беларускiх рублёў нiчога грандыёзнага я купiць не магу. Без бацькоўскай падтрымкi, безумоўна, даводзiлася б цяжкавата. Пакуль вучылi мяне аднаго, было лягчэй, а зараз i брат паступiў. Таму я стараюся падпрацоўваць грузчыкам. Складана, але лiшняя капейка не перашкодзiць.

Думаю, што можна пражыць на стыпендыю, калi абмежавацца толькi ежай, сном i вучобай. Бо, каб, напрыклад, схадзiць у кiно, трэба аддаць 6 тысяч рублёў. Гэта аднаму, а калi дзяўчыну, якая падабаецца, запрасiць...

Света, БДУ, 3-i курс:

— Я, напрыклад, задаволена дзяржаўнай падтрымкай. У дадатак да стыпендыi мне час ад часу выплачваюць прэмii. Бо я з’яўляюся старастай i сакратаром БРСМ факультэта. Гэтыя грошы разыходзяцца на падарункi сябрам, ежу (я жыву ў iнтэрнаце, а з дому харчоў на цэлы месяц, безумоўна, не прывязеш), праязны бiлет, толькi 30 тысяч трэба аддаць, каб з’ездзiць дадому i назад.

Iра, БДУ, 4-ы курс:

— Я не атрымлiваю стыпендыi. Грошы на жыццё выдзяляюць бацькi. Рузумею, што iм нялёгка: трэба ж яшчэ i за вучобу немалую суму плацiць.Таму я i пайшла працаваць рэкламным агентам. Хочацца быць незалежнай. Так прыемна сказаць мацi, што на кiшэнныя выдаткi я зарабiла сама.

Як бачыце, ступень задаволенасцi студэнта залежыць ад многiх фактараў. А вось памер стыпендыi толькi ад аднаго: сярэдняга бала ў залiкоўцы. Чым ён большы, тым большую суму грошай атрымае студэнт.

Напэўна, не ўсе ведаюць, што, акрамя звычайных стыпендый, маюцца яшчэ i прэзiдэнцкiя, iмянныя i стыпендыi Нацыянальнага банка. Яны прызначаюцца студэнтам, пачынаючы з трэцяга курса. Для таго, каб стаць уладальнiкам прэзiдэнцкай стыпендыi, трэба мець толькi «дзевяткi» i «дзесяткi» за ўсе курсы навучання, каб атрымаць iмянную стыпендыю — такiя ж адзнакi за апошнiя чатыры семестры. Стыпендыю Нацыянальнага банка могуць атрымаць толькi студэнты эканамiчнага факультэта i факультэта мiжнародных адносiнаў. Асноўная ўмова — «дзевяткi» i «дзесяткi» ў залiкоўцы за апошнiя два семестры. Паводле слоў метадыста галоўнага ўпраўлення вучэбнай i навукова-метадычнай працы БДУ Юлii Цвiрко, раней такiя стыпендыi давалi ў асноўным пяцiкурснiкам, цяпер, з увядзеннем дзесяцiбальнай сiстэмы ацэнкі ведаў, iх выдаюць i студэнтам чацвёртага курса.

Для поўнай карцiны прадстаўляю вашай увазе вынiкi апытання, праведзеныя на сайце факультэтата журналiстыкi БДУ. У iм прынялi ўдзел 123 студэнты.

Атрымаўшы стыпендыю, вы...

выдаткоўваеце яе на ежу, адзенне — 26 чалавек;

купляеце дыскi, касеты, кнiгi — 16;

дорыце падарункi блiзкiм — 6;

страчваеце на забавы — 21;

вяртаеце даўгi — 10;

адкладваеце грошы — 13;

а мне яе не плацяць — 31.

Усе студэнты-бюджэтнiкi лiчаць днi да наступнай стыпендыi. Асаблiва тыя, якiя нiдзе не падпрацоўваюць. Але, незалежна ад памеру дзяржаўнай дапамогi, ва ўсе часы, упэўнена, парты у лекцыйнай зале будуць «упрыгожваць» словы накшталт гэтых:

Хутчэй бы дадому,

Ну хоць на хвiлiнку,

Каб чорнага хлеба

Згрызцi скарынку.

Як бачыце, студэнцкае пачуццё гумару не мае межаў i знаходзiць адлюстраванне нават у праблеме хлеба надзённага i матэрыяльных даброт. Канешне, згаджуся, што на студэнцкую стыпендыю ў сталiцы пражыць немагчыма. Але тая матэрыяльная падтрымка, якую аказвае дзяржава штомесяц, бясспрэчна, не толькi з’яўляецца стымулам для вучобы, але i дае значную палёгку бацькам.

Надзея ДРЫЛА.ывецкi кошык студэнта