Беларусь гатова да адкрытага супрацоўнiцтва з Еўропай на аснове ўзаемнай павагі

Источник материала:

У гэты дзень Прэзiдэнт прыняў даверчыя граматы паслоў васьмi дзяржаў — Лiтоўскай Рэспублiкi, Французскай Рэспублiкi, Рэспублiкi Бенiн, Рэспублiкi Экватарыяльная Гвiнея, Грэчаскай Рэспублiкi, Арабскай Рэспублiкi Егiпет, Каралеўства Iспанiя, Рэспублiкi Сьера-Леоне.

Прэзiдэнт выказаў перакананасць у тым, што ў аснове любой дыпламатычнай мiсii павiнны быць паняццi мiру i дабра, iмкненне зрабiць адносiны памiж дзяржавамi надзейнымi, партнёрскiмi i ўзаемавыгаднымi.

Аляксандр Лукашэнка ў сувязi з гэтым заклiкаў дыпламатаў выбудоўваць двухбаковыя адносiны на аснове агульнасцi iнтарэсаў.

Паводле слоў Прэзiдэнта, зацiкаўленасць Беларусi ў актывiзацыi ўзаемадзеяння з Французскай Рэспублiкай абумоўлена ў першую чаргу яе значнай роляй у палiтычным i эканамiчным жыццi Еўропы. На думку кiраўнiка дзяржавы, Францыя магла б заняць узважаную пазiцыю пры правядзеннi ўсебаковага дыялога памiж Беларуссю i Еўрапейскiм саюзам. Беларусь i Францыя нарошчваюць узаемны тавараабарот, якi па вынiках 2006 года склаў $473,3 млн.

У адносiнах з Лiтвой Беларусь прытрымлiваецца прынцыпаў добрасуседства, узаемапавагi, неўмяшання ва ўнутраныя справы i чакае такога ж падыходу ад лiтоўскага боку, — заявiў Прэзiдэнт. Дзве дзяржавы, на яго думку, маюць агульныя iнтарэсы ў палiтычнай, эканамiчнай, энергетычнай i прыродаахоўнай сферах. «Мы сёння гатовы будаваць з Лiтвой самыя цёплыя, добрыя адносiны ва ўсiх сферах жыцця», — заявiў Аляксандр Лукашэнка. Беларуска-лiтоўскi тавараабарот у 2006 годзе склаў $603 млн.

Прэзiдэнт перакананы, што Беларусь i Iспанiя цяпер павiнны сканцэнтраваць намаганнi на развiццi i дыверсiфiкацыi ўзаемнага гандлю, арганiзацыi рэгулярнага правядзення вiзiтаў дэлегацый дзелавых колаў.

Узрастаючая роля Iспанii ў еўрапейскiх i сусветных структурах, дасягнуты ёю ўзровень эканамiчнага развiцця з’яўляюцца значнымi перадумовамi для актывiзацыi беларуска-iспанскiх адносiнаў, падкрэслiў кiраўнiк дзяржавы. Ён выказаў удзячнасць iспанскаму боку за дапамогу, што аказваецца ў мiнiмiзацыi наступстваў чарнобыльскай катастрофы. У 2006 годзе ўзаемны тавараабарот памiж Беларуссю i Iспанiяй перасягнуў $100 млн.

Адзначыўшы канструктыўную пазiцыю Грэцыi па пытанню аб статусе Беларусi ў рамках Абагульненай сiстэмы прэферэнцый ЕС, Прэзiдэнт выказаў перакананасць у далейшым паступальным развiццi двухбаковага супрацоўнiцтва з гэтай краiнай. «У гэтым зацiкаўлены абедзве дзяржавы», — лiчыць Аляксандр Лукашэнка.

Беларускi лiдар назваў Егiпет адным з асноўных палiтычных i гандлёвых партнёраў Беларусi ў рэгiёне Блiзкага Усходу. Прэзiдэнт падкрэслiў, што ў 2006 годзе ўдалося значна нарасцiць пастаўкi беларускай тэхнiкi на егiпецкi рынак, што зрабiла яго адным з буйнейшых спажыўцоў прадукцыi беларускага машынабудавання ў далёкiм замежжы. Беларусь мае намер i ў далейшым развiваць супрацоўнiцтва ў гэтым напрамку, ствараючы зборачныя вытворчасцi беларускай тэхнiкi ў Егiпце, дадаў кiраўнiк дзяржавы.

Аляксандр Лукашэнка пацвердзiў, што Беларусь гатова да наладжвання рэгулярных афiцыйных кантактаў з урадамi Бенiна, Сьера-Леоне, Экватарыяльнай Гвiнеi як на двухбаковай аснове, так i ў рамках розных мiжнародных форумаў.

Прэс-служба Прэзiдэнта Рэспублiкi Беларусь.