«Забарона веснавога палявання на птушку — абсурд»

Источник материала:

Сяргей РАСОЛЬКА

А я лiчу так!

Летась у краiне ўпершыню даволi актыўна i шырока абмяркоўвалася пытанне магчымай забароны палявання на птушку ўвесну. Галоўным аргументам прыхiльнiкаў гэтай iдэi быў заклiк да пераймання вопыту большасцi еўрапейскiх краiн — з мэтай захавання рэпрадукцыйнага патэнцыялу вадаплаўнай птушкi. Тады забароне веснавога палявання фактычна ледзь не «паспрыяў» птушыны грып, хоць сама прапанова ў чыстым выглядзе — без спасылкi на магчымую «крылатую» хваробу — выклiкала ў многiх неадназначную рэакцыю. Як ужо паведамлялася, i сёлета веснавую мiграцыю пералётных птушак беларускiя спецыялiсты лiчаць найбольш небяспечнай у плане магчымага заносу на нашу тэрыторыю высокапатагеннага ўзбуджальнiка птушынага грыпу з паўднёвага накiрунку. Хоць нядаўнiя выпадкi з птушыным грыпам у Падмаскоўi ўжо засведчылi, што шляхi распаўсюджвання навалы не абавязкова могуць быць звязаны з пералётнымi птушкамi. Тым не менш, згодна з Правiламi вядзення паляўнiчай гаспадаркi i палявання, крыху больш чым праз два тыднi веснавое паляванне павiнна распачацца ў чарговы раз. Цi пачнецца? Якiя зноў будуць гучаць аргументы «за» i «супраць»? Напярэдаднi сезона мы пацiкавiлiся меркаваннем па гэтай праблеме ў кандыдата бiялагiчных навук, загадчыка сектара паляўнiцтвазнаўства i рэсурсаў паляўнiчай фаўны Iнстытута заалогii i Нацыянальнай акадэмii навук Беларусi Уладзiмiра Тышкевiча.

— Забаранiць веснавое паляванне на птушку, напрыклад, на вальдшнэпа, цецерука, гуся — значыць, фактычна паставiць на каленi паляўнiчыя гаспадаркi. Яны ўкладваюць сродкi ў развiццё iнфраструктуры, адпаведна, разлiчваюць вярнуць фiнансы (праз арганiзацыю палявання), якiя былi выдаткаваны, — сказаў Уладзiмiр Яўгенавiч. — Забарону на паляванне, як правiла, iнiцыіруюць «зялёныя». Я кантактую з мiнiстрам прыроды Польшчы, дык, паводле яго меркавання, апошнiя працуюць «пад заказ», маючы да 100 тысяч долараў за кожны вiд птушкi i жывёлы, унесеных ў нацыянальную Чырвоную кнiгу. Давайце паразважаем, каму што выгадна? Чые iнтарэсы лабiруюцца ў першую чаргу?

Сярэднi французскi паляўнiчы з лiстапада па сакавiк з падружэйнымi сабакамi здабывае ад 200 i больш вальдшнэпаў, якiя выраслi ў Беларусi або Расii. Скажыце, цi вялiкi на гэтым фоне будзе ўрон, калi беларускi паляўнiчы за сезон здабудзе дзве-тры птушкi? Калі за вясну ў краiне будзе здабыта 10 тысяч вальдшнэпаў — у параўнаннi з 2 мiльёнамi птушак, што здабываюцца ў Еўропе? Беларускiх паляўнiчых ужо i так фактычна паставiлi на каленi, асаблiва сельскiх — чалавек не можа пайсцi ў лес i здабыць птушку. Вы паглядзiце, са 150 тысяч у краiне засталося толькi 30 тысяч паляўнiчых...

Як падкрэслiў далей Уладзiмiр Тышкевiч, магчымую пагрозу ад птушынага грыпу нiхто з рахункаў не здымае. Аднак перш чым гаварыць аб праблеме, трэба атрымаць неабходныя даныя аб захворваемасцi птушкi. «А як можа з’явiцца такая iнфармацыя? Толькi калi пачнецца паляўнiчы сезон i паляўнiчыя будуць паведамляць звесткi аб загiнулай птушцы. Толькi пасля абагульнення такой iнфармацыi, яе аналiзу на заканадаўчым узроўнi можа быць прынята рашэнне аб увядзеннi забароны на веснавое паляванне на птушку».